Fire extinguishers sa Talisay CH nangawagtang gituohang gikawat

Mga sakop sa General Service Office sa dakbayan sa Talisay naalarma tungod sa pagkawagtang sa fire extinguisher ug sa mga accessories sa fire extinguisher nga gipamutang diha sa mga buhatan sa city hall sa siyudad.

Si Joan Vebar hepe sa GSO daling mitaho sa maong insidente sa kapolisan sa siyudad.

Matud ni Vebar nga niadtong petsa 12 niining buwana mipahigayon sila og imbentaryo sa mga butang sa siyudad.

Gipasusi ni Vebar ang mga fire extinguisher nga gibutang diha sa mga buhatan sa city hall tungod kay lakip kini sa ilang imbentaryo.

Apan nakugang nalang sila tungod kay ang usa ka fire extinguisher diha sa engineering office nawagtang na og ang usa nga nahibilin wala nay "fire hose nozzle".

Nawagtangan usab og mga fire hose nozzle ang mga fire extinguisher sa GSO electrical room, treasurer's office, buhatan sa Bise Mayor ug chapel.

Sa buhatan sa Land Transportation Office (LTO), archives ug ang pansayan, nawagtangan ang mga aksa nga usa usab untang gamiton kung adunay mahitabong emerhensiya.