Tanod patay, 4 nangaangol

Namatay ang barangay tanod sa Pusok, dakbayan sa Lapulapu ug naangol usab ang lain pang upat ka tawo dihang kalit lang giharos sa pagdasmag sa sakyanan alas 2 pasado ang takna sa miaging kaadlawon.

Si P03 Danilo Aying miila sa namatay nga mao si Primitivo Mabano Atillo, 42 anyos, minyo nga barangay tanod sa Pusok ug ang nangaangol nga kadungan niining naglakaw sa dalan M.L. Quezon sa Pusok nga pulos usab nangaangol.

Ang mga naangol mao sila si Joseph Amiscua, 33 anyos, ulitawo ug lumad nga taga San Carlos City ug lain pa niining tulo ka mga kauban nga nakabaton og mga gagmay nga pangus ug bun-og sa ilang kalawasan.

Gimaneho ni Paterno Doldolla Jr., 28 anyos, ulitawo nga taga dalan F. Jaca sa Inayawan, dakbayan sa Sugbo ang sakyanan nga nakadasmag sa biktima nga nagdala sa plate number GWZ 331.

Sa imbestigasyon nga gihimo ni P03 Jose Ruel Nalzaro sa traffic section nga nagdagan gikan sa dakbayan sa Mandaue ang sakyanan nga nakadasmag sa mga biktima.

Matud pa niya nga unang midasmag ang maong sakyanan sa skywalk sa maong dapit ug milahos pagbangga ngadto sa nag-parking nga laing sakyanan ug giharos ang mga biktima nga naglakaw.

Si P03 Aying miingon nga positibo nga nakainom og ilimnong makahubog ang maong driver nga nakadasmag sa mga biktima kinsa gitanggong bilanggoan.