Nanulis sa Bank of Ormoc nailhan na sa kapolisan

Nailhan na sa kapolisan sa Mandaue ang usa sa duha ka tawo nga mitulis sa Bank of Ormoc sa dalan A. Del Rosario sa Guizo, Mandaue sa milabay'ng hapon.

Matud pa ni Mandaue City Police Office Director Sr. Supt. Alexander Abadinas sa ilang padayon nga imbestigasyon, usa sa empleyado sa maong bangko nga si Raymund Alburo positibong miila sa hulagway sa tulisan nga iyang gikaatubang atol sa pagtulis sa maong bangko sa milabay'ng hapon.

Si Alburo miasoy ngadto sa kapolisan nga dili siya makalimot sa panagway sa tulisan gumikan kay dugay sila nagka-estorya niini, gumikan sa pagpakaaron-ingnon nga kliyente sa maong bangko sa wala pa modeklarar og tulis.

Hinuon, dili pa makabutyag si Abadinas sa ngalan sa tulisan gumikan kay ila pa kining gipanid-an ug ang kauban niini aron dili makaipsot sa mga operatiba sa kapolisan.

Subay niini, si Abadinas naglaraw sa pagpaubos sa mga empleyado niini sa 'lie detection test' aron masita kun wala bay kalambigitan ang anggulo nga inside job sa maong tulis.

Matud pa ni Abadinas nga nakamatikod ang mga imbestigador sa wala magkadimaong pamahayag sa mga empleyado atol sa maong insidente ug nagtagotago ang branch manager sa maong bangko nga si Benjamin Alfaro sa dihang buot kining sukitsukiton ni Insp. Ramon Villar sa Intelligence and Investigation sa MCPO kalabot sa maong hitabo.

Samtang si Mayor Thadeo Ouano sa iyang bahin wala mokomentaryo sa maong insidente ug mihatag lamang og panghinaot kang Abadinas nga masulbad ang kaso sa labing daling panahon ug masikop ang tulisan ug ang look-out niini.

Kahinumduman nga sa milabay'ng hapon, duha ka mga tawo nga luwan sa usa ka motorsiklo nakakuha gyud og P308,338.63 gikan sa Bank of Ormoc. Ang usa sa duha ka tulisan misulod sa bangko ug ang usa nagpabilin isip look-out ug nagmaneho nang daan sa motorsiklo isip get-away vehicle.