Rambol sa tinago; 1 patay, 1 samdan

Usa ang namatay ug laing usa ang nasamdan human maigo sa pugakhang sa dihang nagkarambola ang grupo sa mga batan-on tali sa gituohang sakop sa Alpha Kappa Rho atol sa gipahigayong disko sa Sitio Putat, Bagumbayan, Tinago ning dakbayan sa Sugbo kagahapon sa alas 4 kaadlawon.

Ang napagan ug namatay pipila ka gutlo sulod sa Chong Hua Hospital mao si Josephine Fernandez, 45, minyo human makangkon og pinusilan diha sa walang abaga ug nawong. Samtang gihatod sa Cebu City Medical Center si Imelda Enecillo, 37, minyo human makaangkon og samad sa iyang walang bukton nga gituohang naigo sa boletas sa bala sa pugakhang.

Ang gitumbok nga nakapusil mao si Jordan Linabog, 16, tinun-an sa unang tuig sa Tejero Night School ug nagpuyo sa dalan Palma, San Roque ning siyudad.

Sila si Zacarias Romatado, Wendelyn Perales ug ang bana sa namatay nga si Petty Officer 3 Olivero Fernandez usa ka sakop sa Philippine Navy miasoy ngadto ni SPO2 Rey Cuyos sa Homicide Section nga samtang dunay gipahigayon nga disko sa maong lugar kalit lang dihay mitumaw nga kagubot tali sa mga batan-on.

Si Linabog uban ni William Batendaan, 34, ulitawo nga taga McArthur Boulevard ning dakbayan sa Sugbo uban sa laing usa ka kauban nga nailhan lang sa pangalan nga Poloy ug ang usa nga wala pa mailhi.

Si Petty Officer 3 Fernandez maoy migawas ug mibadlong sa duha ka grupo sa mga batan-on nga nagkarambola nga mohunong ug papaulion sa ilang tagsa-tagsa ka lugar.

Apan dihay mipaka nga usa ka buto sa armas ug nangaigo ang duha ka mga biktima nga diha sa duol sa diskohan.

Si SPO1 Rene Sultan nga nagpuyo ra usab sa maong lugar daling nakaresponde sa maong hitabo nga miresulta sa pagkasikop ni Linabog ug Batendaan. Ang duha nila ka kauban wala madakpi sa kapolisan human makaikyas palayo sa maong dapit.

Si Linabog nga nahinabi sa Banat News kagahapon kinsa nakaangkon usab og daghang bun-og sa nawong mitug-an nga gikasuyaan ang ilang grupo sa Akrho nga pulos residente sa naasoy'ng lugar.

Matud ni Linabog nga unang gikulata si Batendaan sa dili mominos upat ka mga sakop sa Akrho ug dayon gisunod siya.

Giangkon ni Linabog nga siya maoy nakapusil sa duha ka biktima human siya gipahulam og pugakhang sa iyang higala.

"Gawas rami nag-inom gisuyaan lang gyud mi sa mga sakop sa Akrho, gitabangan ko og kulata, gibunalbunalan og bangko, nakahulam man ko ug pugakhang sa akong higala, ngitngit naman gud kaayo sir, pero kausa rako nakapabuto sir."

Ang duha ka suspetsado kasamtangan karon gitanggong sa detention cell sa Cebu City Police Office samtang nagpaabot sa tukmang kaso nga ipasaka batok kanila.