CH mangasog sa rollback sa plete

Mohimo og lakang ang mga opisyal dinhi sa dakbayan sa Sugbo aron ikapatuman dinhi sa Sugbo ang roll back sa pletehan susama sa gihimo karon didto sa kaulohan.

Si Konsehal Sylvan Jakosalem, tsirman sa committee on transportation gitakdang mo-lobby ngadto sa Land Transportation, Franchising and Regulatory Board (LTFRB-7) aron ipatuman usab ang pagpaminus sa pletehan dinhi sa dakbayan.

Didto sa kaulohan gipatuman sa LTFRB sugod niadtong Lunes ang 50 sentabos nga roll back gikan sa P7.50 nga minimum nga pletehan gihimo na lang kini karon nga P7.00.

Dinhi sa Sugbo, gitinguha sa konsehal nga ikapatuman ang 50 sentabos nga roll back aron ang P6 nga minimum mahimo nalang ngadto sa P5.50.

Alang sa konsehal nga kun siya maoy pabut-on mas maayo unta nga dunay patakaran nga sundon nga sa matag kunhod sa presyo sa produktong petrolyo mominos usab ang pletehan ug sa panahon nga mosaka ang presyo umentohan usab ang pletehan.

Ang Nagkahiusang Drayber sa Sugbo (NADSU) una nang mipadayag og kabalaka sa posibling pagpatuman usab og roll back sa pletehan dinhi sa Sugbo susama sa nahitabo didto sa kaulohan.

Apan mipadayag na daan og pagsupak ang NADSU sa maong lakang tungod kay alang nila wala na kinahanglana ang roll back dinhi sa Sugbo tungod kay dihang gipatuman ang P2 nga umento sa pletehan sa kaulohan piso lang ang gipatuman dinhi sa Sugbo hinungdan nga ang minimum kaniadto nga P5 nahimong P6.