Minilyon nga alahas ug kwarta sa Hapon gilungkab

Minilyon nga kantidad sa mga alahas, salapi ug uban pang mahalong butang nahanaw nga iya sa usa ka Japanese national human ang panimalay niini sa Block 1, Lot 3 sa Garden Ridge Village sa Cabancalan, dakbayan sa Mandaue ang gilungkab sa miaging gabii.

Si SPO3 Gil Roco, imbestigador sa Presinto 4 sa Casuntingan Police Station, miila sa biktima nga mao si Tura Saito, hingkod ang panuigon, minyo, lumad nga taga Tokyo, Japan ug temporaryong nagpuyo sa maong dapit.

Matud pa ni SPO3 Roco nga wala hiilhing mga tawo ang nakasulod sa panimalay sa biktima pinaagi sa paglungkab sa atubangang pultahan diin sila nanulod ug sa luyong pultahan na moagi sa paggawas nga dala na ang maong mga butang.

Naglakip sa nasakiyo sa mga kawatan mao ang mga alahas nga Rusian gold necklace nga P52,000 ang kantidad, German silver ring nga P2.5 milyones ang kantidad, Sony Ericson cellular phone nga P16,000 ug pitaka nga may sulod nga nga salapi nga P8,000.

Si PO3 Gaudios Mondejar ug P02 Jefferson Jacalan nga kuyog ni SP03 Roco miingon nga giputol sa mga kawatan ang sliding screen ug giligwatan ang kandado niini nga maoy hinungdan nga naabli.

Nagpadayon pa karon ang ilang pakisusi sa pag-ila sa mga kawatan nga ilang gituohan nga sinati kaayo sa maong panimalay.