Balik sa trabaho-Tedy ngadto's mga kawani

Ang mao niyang kamanduan iyang gihimo pinaagi sa giluwatan niining memorandum circular human sa ilang panagtigum sa City Disaster Coordinating Council meeting niadtong Sabado.

Gihimo ni Ouano ang pagluwat sa maong kamanduan human usab sa nahitabong pag-oktaba sa 12th Association of Southeast Asians Nations (Asean) Summit.

Ang maong panagtigum sa mga presidente ug primero ministro gikan sa mga nasud nga sakop sa Asean gikatakda na unta karong adlawa, Lunes, Disyembre 11 hangtod sa Huwebes, petsa 14 niining bulana.

Kahinumdoman nga ang upat ka adlaw nga walay trabaho nga magsugod karong adlawa Lunes, hangtod sa Huwebes natigayon unta human ideklarar ni Presidente Gloria Macapagal Arroyo ang upat ka adlaw nga holiday.

Ang mga tinun-an sa mga tunghaang pampubliko ug pribado nga nalakip usab unta sa walay klase sa maong deklarasyon ni Arroyo nga upat ka adlaw nga holiday mobalik usab sa naandan nilang klase.

Ang National Organizing Committee nga gipangulohan ni Ambassador Marciano Paynor kalit lang mipahibalo nga gi-oktaba ang Asean Summit human usab ang bagyong Seniang miigo sa Sugbo.