Mga barko dili paduolon duol sa mga hotel, resort

Mga sakyanan sa kadagatan nga molabay sa dakbayan sa Lapu-Lapu higpit nga gipahimangnuan sa dili pagpaduol sa mga hotel ug beach niini atol sa 12th Association of Southeast Asian Nation (Asean) summit sa Sugbo.

Ang pahimangno giluwatan ni District Commander Manolito Malig-on sa Philippine Coastguard nga gipadala kagahapon ngadto sa mga shipping company ug sa tanang matang sa sakyanan sa kadagatan.

Si Petty Officer 1st Class Inocencio dela Cruz nga gikahinabi sa Banat News miingon nga pamaagi sa paghatag og kasiguroan sa mga langyaw nga delegado nga nagpuyo sa mga hotel nga nahimutang sa daplin sa kadagatan sa maong dakbayan.

Naglakip niini ang Hilton Hotel sa Punta Ingaño nga gipuy-an sa mga Japanese national, Shangri-la Hotel and Spa, Plantation Bay, Waterfront Hotel.

Si dela Cruz miingon nga ang tanang matang sa sakyanan sa kadagatan nga molabay higpit nga gipahimangnuan sa pagtuman 1,000 yarda ang gilay-on sa ilang paglabay sa mga hotel ug beach resort sa dakbayan.

Samtang 2,000 yarda usab ang gilay-on sa mga barko sa ilang paglabay sa mga barko sa habig nga bahin sa kadagatan sa Hilotongan Island sa lungsod sa Cordova.

Dugang pa niya nga ang mga barko sa pier area sa dakbayan sa Sugbo higpit usab nga gidid-an sa pagdunggo sa alas 6 sa gabii ug ang paglawig sa panahon sa gabii gawas lamang sa mga emerhensiya.