Terror report 'bahaw na' - Alarcio

Bahaw na ang migawas nga report kabahin sa posibleng terror attack nga giingong nadawat nga impormasyon sa lima ka mga nasud nga mipagawas og travel advisory sa ilang mga ginsakupan kabahin sa terrorist attack nga nag-ung-ong tungod sa umaabot sa Asean Summit.

Kini maoy gibutyag ni Chief Supt. Silverio Alarcio,Jr. ang direktor sa Police Regional Office 7 kinsa mao ang Task Force - Cebu commander alang sa summit.

"Natanggap na natin iyan, since June pa iyan eh, we have conducted verifications but we have not found any indication that they are already here, the intention is there, but as to how to carry it out hindi pa tayo nakakatanggap nga information tungkol diyan," asoy pang Alarcio sa Banat News.

Ang Estados Unidos, Britanya, Australya, Japan ug New Zealand mipagawas og pahimangno sa ilang mga residente nga dili una mobiyahe nganhi sa Sugbo tungod sa mga nadawat nilang hulgang posibleng atakihon ang kalihukan sa summit sa mga pundok sa mga terorista.

Giangkon ni Alarcio nga dako kaayo ang posibilidad nga mamahimong target ang summit sa mga terorista ug wala usab nila isalikway ang kamatuuran kabahin niini.

"The summit is an international event and is likely a target," dugang pang Alarcio.

Giangkon usab ni Alarcio nga ang pangalan sa grupong Rajah Sulaiman Movement nga ang mga miyembro kanhi mga Kristiyano nga nagbalik Islam maoy usa sa mga nadawat nilang impormasyon nga moatake dinhi kaniadto pa.

Kahinumduman nga niadtong bulan sa Mayo duha ka mga giingong sakop sa RSM ang napatay sa mga sakop sa Cebu City Police Office human mitanom og bomba diha sa usa ka dakong department store sa North Reclamation Area.

Ang maong napatay mao sila si Ali Usop ug Datu Neil Usop nga gikatahong gigukod ng daan sa CIDG-National Capital Region, usa sa ilang local contact nga taga Mandaue kinsa gipangita pa karon mao si Dino Amor Rosalejos Pareja alyas Khalil Pareja.