Tedy O. Gihika, ipasuspenso sa Norkis

Ang mga abogado sa Norkis Trading Company misang-at og kasong kriminal ug administratiba batok ni Mayor Thadeo Ouano sa Mandaue tungod sa ilegal niyang pag-takeover ngadto sa display center sa kompaniya bisan wala'y pagtugot gikan sa konseho sa dakbayan.

Si Atty. Wilbert Dumon, abogado sa Norkis, misang-at sa kaso sa Office of the Ombudsman-Visayas tungod sa, matud pa kalapasan niini sa Anti-Graft and Corrupt Practices Act ug miawhag sa maong buhatan sa pagbutang sa mayor ubos sa preventive suspension samtang pending pa ang kaso.

Ang kaso nagsugod sa mando ni Ouano nga sa pagbawi sa Norkis Display Center sa Looc, Mandaue niadtong Nobiyembre 29 tungod sa giingo'ng kalapasan sa kompaniya sa Memorandum of Agreement (MOA) tali sa siyudad ug sa Norkis nga gipirmahan niadtong 1993.

Sa MOA nakalatid ang kasabutan sa Norkis ug Mandaue mahitungod sa porsiyon sa luna sa Looc. Matud pa sa complaint nga ang yuta foreshore land kaniadto ug gipaabangan sa kagamhanang nasyonal ngadto ni Norberto Quisumbing Jr., chairman sa Norkis, niadtong 1960.

Sayo sa mga tuig 1970, ang Norkis mi-reclaim sa yuta nga mao na karon ang nahimutangan niini, ug sukad niadto, ang Norkis padayon nag-okupar ug naggamit niini nga nakita sa kadaghanan, sumala pa ni Dumon.

Sa dihang nahimong chartered city ang Mandaue niadtong 1980, misulod kini og lease contract sa Norkis, kang kansang kontrata naglatid nga ang Norkis magbayad og P1,000 kada tuig bugti sa paggamit sa luna isip sports center ug storage facilities sa kompaniya.

Niadtong 1993, ang porsiyon sa 17,432 metro kuwadrado sa yuta, mga 6,000 metro kuwadrado ang na-recover ni kanhi Mayor Alfredo Ouano ug gidonar ngadto sa Mandaue City National Comprehensive High School. Laing MOA ang gipirmahan sa Mandaue ug sa Norkis.

Diha sa MOA, ang kagamhanan sa Mandaue makaputol lamang sa MOA kun ang Norkis mapakyas pagtuman sa kondisyon sa kontrata, lakip niini ang pagsumiter og submission plans ug specifications sa mini-park, playground o playground ug laing mga proyekto, lakip na ang pagpatuman niini.

Si Dumon nagkanayon nga kining maong mga kondisyon natuman sa Norkis, apan bisan pa, nahibulong sila nga si Ouano mipahibalo sayo ning tuiga nga iyang putlon ang kontrata. Matud niya nga bisan walay "authority" sa konseho, nga maoy mi-authorize sa mayor pagpakig-negotiate sa Norkis, si Ouano mi-takeover sa maong luna.

Human sa ilegal nga pag-takeover ni Ouano niadtong Nobiyembre 29, nasuta nila nga ang ilang mga propriedad gipangkuha ug gipamaligya, sama sa mga sin.

Gihulagway sa reklamo ni Dumon nga ang gihimo ni Ouano "illegal, unjust, improper ug oppressive."