CICC gibendisyonan na

Bisan sa mga pangutana ug mga pagsaway batok sa pagtukod sa Cebu International Convention Center malamposon kining na-inugorahan kagahapon sa buntag.

Si Arsobispo Ricardo Cardinal Vidal maoy selebrante kagahapon ug mibendisyon sa 2nd floor sa edipisyo ug si Arsobispo Vicente Manuel ang mibendisyon a sa ground floor.

Si Vidal nagkanayon sa iyang wali nga ang CICC simbolo sa kalampusan sa damgo sa mga Sugboanon. Isip usa ka Sugboanon mapasigrabohon siya niini ug sa mga tawo kinsa naningkamot nga matuman ang maong proyekto

Isip usab usa ka Pilipino mapasigarbohon usab siya tungod kay ang nasud nga Pilipinas mailhan sa tibuok kalibutan sa maong kalambuan.

Giawhag sa arsobispo nga ang tanan angaya'ng maghiusa gikan sa grupo sa kagamhanan, patigayon, civil society ug ang simbahan para makab-ot ang kalambuan.

Kinahanglan nga ipahikling ang "crab mentality", pagsige og saway nga nakahatag og kadaot sa uban.

Sa laing bahin, si Foreign Affair Secretary Alberto Romulo, tsirman sa 12th Asean Summit nagkanayon nga ang mga Sugboanon angayang mapasigarbohon tungod sa gipakitang leadership ug political will sa mga Sugboanong opisyal.

Si Romulo mipadayag sa iyang pasidungog sa mga tawo kinsa naningkamot nga mahimong posible ang maong proyekto.

Si Gobernador Gwendolyn Garcia sa iyang speech kagahapon mipasalamat sa mga opisyal ug mga tawo nga mihatag og ayuda nga malampos ang nahisgutang proyekto bisan pa sa mga pangutana ug pagsuway nga nasinati.