Kagawad sa Sawang Calero ikiha sa BIR

Gipasakaan og kasong tax evasion sa Bureau of Internal Revenue (BIR) ngadto sa Department of Justice ang barangay kagawad sa Sawang Calero dakbayan sa Sugbo nga si Reynaldo "Rene" Jose ingon man ang asawa niini nga si Carolina Jose.

Sa imbestigasyon nga gihimo sa BIR nasuta nga dunay P16,035,423.77 ang kinatibuk-ang buhis nga wala mabayri sa magtiayong Jose ngadto sa BIR niadtong tuig 2003 ug 2004 diin ang P11,901,730.14 naggikan sa income tax ug ang VAT niini nga moabot og P4,133,693.63.

Sa gihimong verification sa BIR Integrated Tax System nagpakita nga igo lang mideklarar og gross revenues ang magtiayon nga P176,700 niadtong tuig 2003 ug P230,100 niadtong tuig 2004 sa ilang pag-operate og dormitory nga mao ang Sto. Niño Dormitory.

Nadiskubrihan usab sa imbestigasyon nga gihimo sa BIR nga dunay negosyo ang magtiayon nga mao ang pagdumala og lending investment ug foreign exchange nga wala marehistro sa BIR.

Narehistro lang ang mao nilang mga negosyo sa Cebu City Hall gikan niadtong 1997 hangtod sa tuig 2001.

Ang nakabulilyaso sa mga negosyo sa magtiayong Jose nga wala nila gideklarar sa BIR mao ang kasong gipasaka sa usa ka Purita Suarez batok kang Carolina diin nakabayad sila sa interes sa ilang loan nga P2,347,050 sa bulan sa Oktubre hangtod sa Disyembre 2003 ug P18,663,500 gikan sa Enero hangtod sa Abril tuig 2004.

Si kagawad Jose gipasakaan usab og kaso gumikan sa kapakyas niya pag- file sa iyang income tax return gikan sa tuig 1997 hangtod sa 2005 ug ang iyang asawa nga si Carolina gikiha sab sa BIR tungod sa tax evasion gumikan sa kapakyas niini og tug-an sa tanan nilang negosyo ug revenues.

Gihingusgan sa BIR ang paggukod sa mga tax evaders tungod sa gipalapdan nga Run After Tax Evaders (RATE) program sa gobyerno.

Gisuwayan unta pagkontak sa Banat News si kagawad Jose sa iyang pinuy-anan kagahapon sa udto aron pagkuha sa iyang habig apan matud sa nakatubag duna kini gilakaw.