Kamot gi-samurai hapit gyud maputol

Hapit maputol ang kamot sa usa ka 39-anyos nga lalaki human kini tigbasa og samurai sa igsuon sa drayber nga ilang gikulata kagahapon sa buntag diha sa Lawaan III, Talisay.

Daling gidala diha sa Vicente Sotto Memorial Medical Center si Juanito Palagtiosa, residente sa maong lugar human kini gitigbas ni Mario Cuizon, 29, lumad nga taga Carcar apan temporaryong nagpuyo diha sa lugar.

Si Fernando Cuizon, 24, manghod ni Mario, drayber sa PUJ nga magbiyahean og Bulacao-Pardo-Cebu City mibutyag kagahapon sa Banat News nga nagsunod ang ilang sakyanan sa usa usab ka drayber og PUJ nga dunay rotang San Fernando.

Gimanduan niya ang maong drayber nga pa-abantihon para makasulod siya sa ilang garahean apan nasuko hinuon kini.

Mibahad ang maong drayber nga mobalik ug pagbalik niini daghan na kining mga kuyog kinsa usa sa kuyog si Palagtiosa.

Gisulod si Fernando diha sa garahian sa maong drayber ug sa mga kauban niini ug gitabangan og kulata.

Matud ni Fernando nga pwerte niyang lihay-lihay ug nagliyok-liyok siya sa sakyanan aron dili siya mabun-og pag-ayo.

Nakita ni Mario ang gibuhat sa mga suspetsado ngadto sa iyang manghod hinungdan nga mikuha kini og samurai ug giwara-wara ngadto sa mga tawo apan wala niini damha nga nawiktan diay niya sa iyang gidalang samurai ang kamot ni Palagtiosa.

Ang magsuong Cuizon nagpakuha sa mga polis gikan sa ilang gipuy-an tungod kay kun mogawas sila tabangan man sila og kuninit sa mga tawo nga kauban sa nangulata ni Fernando kinsa naghuwat diha sa gawas