Mga langyaw'ng militante mahimo gukdon

Mga langyaw'ng militante walay katungod nga mohimo og protesta dinhi sa siyudad sa Sugbo , sumala pa ni Ambassador to Malaysia Victoriano Lecaros, ang opisyal nga tigpamaba sa 12th Asean Summit karong umaabot Disyembre 11 ngadto sa 14 ning tuiga.

Si Lecaros mibisita kagahapon sa buhatan sa The Freeman ug Banat News. Matud pa ni Lecaros nga walay katungod ang mga langyaw'ng militante nga mohimo og mga protesta tungod kay milapas kini sila sa balaod sa Pilipinas ug mianhi sila isip mga turista, hinungdan nga mahimo silang gukdon sa Bureau of Immigration isip undesirable aliens.

"Protest are not necessarily prohibited, pero if they do it in a peaceful way okey ra. With regards to the foreign militants walay gyud silay katungod kay, tourist visa baya ang ilang gikuha and if you say tourist you come here for pleasure," matud pa ni Lecaros

Midugang si Lecaros nga dako og ikatabang ang 12th Asean Summit nga gihimo dinhi sa dakbayan sa Sugbo kay motaas ang kita tungod sa daghang mga turista nga mibisita sa nasud gawas sa mga lider sa maong summit.

Matud pa ni Lecaros nga molambo pa ang ekonomiya sa Cebu human kini mipakita sa katakos nga mohupot og usa ka dakong panagtigum sama sa Asean Summit diin pila lang ka buwan ang preparasyon niini.

Midugang usab kini nga ang gihimong pagpanglimpyo dinhi sa dakbayan sa Sugbo dili lang kini alang sa mga Asean leaders kun dili alang usab kini sa mga Sugbuanon nga maoy makapahimulos unya ini'g human sa upat ka adlaw nga tigum.