2 mireklamo kang Alarcio vs. hepe

Duha ka mga molupyo sa lungsod sa DaanBantayan nangayo'g tabang sa hepe sa kapolisan sa tibuok rehiyon 7, Heneral Silverio Alarcio, Jr. aron masuta ang giingong kapakyas sa hepe sa kapolisan sa lungsod paghimog aksyon sa ilang reklamo.

Sila si Marciano Placencia ingon man si Tereso Garbo, nga pulos molupyo sa barangay Tinubdan sa maong lungsod, pinaagi sa ilang abogado nga si Manlalaban Braulio Arriola, Jr. mipadala og sulat ni Heneral Alarcio niadtong Nobiyembre 23, 2006.

Si Manlalaban Arriola miingon nga niadtong Oktobre 24, si Placenia mipadala og suwat ngadto sa hepe sa kapolisan sa lungsod, Senior Inspector Jovito Canlas Canlapan nga nagreklamo sa gihimo ni Kapitan Juanito Ybañez.

Miusab sila pagpadala og suwat nianang pagka Nobiyembre 4, 2006 sa hepe sa kapolisan sa lungsod apan wala gayud tagda ang ilang reklamo.

Mao kiniy hinungdan nakahukom sila pagdiretso sa ilang reklamo ngadto ni Alarcio gumikan kay wala sila mosalig sa hepe sa kapolisan sa probinsya, S/Supt. Vicente Loot nga maoy bana ni Mayor Malou Loot sa DaanBantayan.

Gireklamo nila si Ybañez gumikan sa mga ilegal nga paghupot niini ug armas, pagsuway sa pag-frame up ni Placencia ug gitumbok kini nga usa ka rebelde.

Midugang si Arriola nga gigamit ni Ybañez si Garbo aron ipatunga si Placencia mao gayud ang tag-ia sa usa ka .38 kalibre nga armas de fuego.

Nabalaka si Arriola sa seguridad sa duha gumikan kay aduna may hulga sa ilang kinabuhi nga angayan mahatagan sa proteksiyon.

Hinuon misang-at na sila og reklamo batok sa kapitan sa buhatan sa Visayas Ombudsman.

Apan matud pa ni Arriola nga ang duha niyang kliyente mao naman hinuon ang gipasakaan og kaso sa kapolisan kay gipasanginlan sila nga mihimo pagpanghulga sa usa ka barangay tanod ug silingan niini.

Gani ang sumbong na grave threats ang gisang-at sa kapolisan nila ni Placencia ug Garbo sa Municipal Circuit Trial Court sa DaanBantayan.

Usa sa gikatingala sa mga nagreklamo nga milabay una ang 15 ka adlaw una pa sila pasakai og sumbong nga gihulagway nila nga walay basihanan.

Sila si Placencia ug Garbo giingon gihasi gumikan kay nagpaluyo kini ug laing kandidato atbang sa anak sa mayor.

Gipanghimakak nila nga mipaluyo sila ni Dr. Jose de Leon gumikan dili man kini kandidato labot pa ang ilang nahibaw-an nga modagan atbang sa anak sa mayor mao man si Engineer Augusto Corro.

Naglaum sila nga si Heneral motagad sa ilang reklamo nga gipaabot niini.