Ceremonial lighting sa CICC karong gabii

Magtagbo sa Cebu International Convention Center (CICC) sa reclamation sa dakbayan sa Mandaue ang mga opisyal sa tulo ka lokal nga kagamhanan nga naglangkob sa Cebu City, Mandaue , Lapulapu ug ang kagamhanan sa lalawigan sa Sugbo alang sa ceremonial lighting nga pagahimoon sayo karong gabii.

Kini ang nasayran sa Banat News kang Senior Superintendent Alexander Abadinas, officer-in charge sa kapolisan sa maong dakbayan sa pagpakighinabi kagahapon.

Si Abadinas miingon nga human sa ceremonial lighting nga isunod ang fireworks display nga ipahigayon usab sa sulod sa compound sa CICC.

Matud pa niya nga si Gobernador Gwendolyn Garcia maoy mangulo sa mga opisyal sa lalawigan sa Sugbo nga magpaabot sa sulod sa CICC maoy motagbo sa mga opisyal nga gikan sa tulo ka dakbayan alang sa dungan nga pagpasiga sa mga sugang dagitan sa kadalanan ug sa sulod sa compound CICC.

Ang kagamhanan sa dakbayan sa Lapu-Lapu nga pangulohan ni Mayor Arturo Radaza, ang kagamhanan sa dakbayan sa Sugbo nga pangulohan ni Mayor Tomas Osmeña ang pagatagboon usab sa mga opisyal sa dakbayan sa Mandaue nga pangulohan ni Mayor Thadeo Ouano.

Gikan sa dakbayan sa Lapulapu ang mga opisyal mohimo sa parada paingon sa maong dapit sa CICC ug motagbo usab sila si Mayor Osmeña nga moparada pinaagi sa pagsayaw sa Sinulog.

Mosugat usab ang dakbayan sa Mandaue nga magsayaw og Mantawi Festival ug mopaingon sa CICC alang na sa dungan nga pagpasiga mga sugang dagitab.

Si Abadinas miingon nga atol sa maong mga kalihokan maoy ilang pagahimoon ang higpit nga pagpatuman sa kahapsay ug kalinaw pinaagi usab sa pagpatuman sa balaod sa kagamhanan.