Dagat sa Talisay gipanid-an

Kadagatan sa siyudad sa Talisay higpit nga gipabantayan tungod sa giingong dunay mga sakop sa Abu Sayaff sakay sa usa ka tag boat gikan sa Surigao ug nagplano kining moduong sa kabaybayonan sa siyudad.

Si Ulysis Fernandez tsirman sa Fishermen Sea Ecological Care (FISECA) mibutyag kagahapon sa Banat News nga gimanduan sila ni Police Superintendent Romeo Perigo Hepe sa kapolisan sa siyudad nga motabang sa higpit nga pagbantay sa territorial water sa Talisay og motaho gyud dayon ngadto sa mga otoridad kung aduna silay mabantayang mga tawo nga magsakay og mga sakyanan sa dagat kinsa mga katahapan ang mga lihok.

Matud ni Fernandez nga matag gabii silang nagpatrolya sa kadagatan diin uban nila sa pagpatrolya ang mga sakop sa augment intelligence group sa Philippine Navy.

Ang mga kapitan usab sa mga barangay gipadalhan na og suwat ni Fernandez para mapahimangnoan ang mga mananagat sa ilang mga lugar nga dili magpasakay og mga tawo diha sa lawod ilabi na kung madudahan ang lihok niini.

Si Perigo sa pakighinabi kagahapon sa Banat News nagkanayon nga kinahanglang doblehon ang ilang pagbantay niining panahona ilabi na nga hapit na ipahigayon ang ASEAN Summit dinhi sa Sugbo.

Ang mga Barangay Intelligence Network, tanod mga opisyal sa mga barangay gipangayo-an nila og tabang para mabantayan ang mga kadagatan sa siyudad para mabantayan dayon kung adunay mga dautang tawo nga posibleng anha moagi sa dagat.