Residente sa Kalunasan nangreklamo

Nagpabilin gihapong baho ang sapa sa Lower Kalunasan luyo sa pasalig nga may "water treatment" na ang linabay'ng hugaw sa mga piniriso sa Cebu Provincial Detention and Rehabilitation Center CPDRC.

Matud pa ni Alice Zapanta, barangay treasurer sa barangay Kalunasan nga samtang walay culvert o kaha "drainage pipe" ang linabay'ng hugaw sa mga piniriso, mag-antos sa kabaho ang mga nanimuyo sa daplin sa sapa sa Lower Kalunasan, gani wa gyu'y isda o kaha mga uwang nga nabuhi sa maong sapa gumikan sa kabaho ug kahugaw niini.

Ang CPDRC nahimutang sa sitio Pagtambayayong, may 500 metros ang gilay-on gikan sa sapa sa Lower Kalunasan, apan ang ilang tubig nga kinaligo matag buntag uban sa ilang ihi ug hugaw sa tawo ipabuhagay paingon ngadto sa sapa hinungdan nga ang tinuagsik ug mga pinisik mamilit sa daplin sa sapa diha sa mga kabatuan ug sa kabalayan.

Matud pa ni Zapanta nga gihangyo na sa ilang Kapitan nga si Francisco Pintor ang jail warden sa CPDRC nga pabutangan og culvert o kaha plastic pipe ang ilang linabay'ng likido nga hugaw sa mga piniriso, apan wa gyud kini magtagad.

Giingong gibutangan na kuno og water treatment ang ilang likido nga hugaw apan matud pa ni Zapanta hangtod karon baho lang gihapon.

Miingon si Zapanta nga ang mga molupyo sa Guadalupe, Capitol ug hangtod sa duol sa dagat, dili na makamatikod tungod kay ang sapa sa Lower Kalunasan mosugat man sa sapa sa Guadalupe hinungdan nga matunaw na ang baho sa linabay gikan sa CPDRC.