Sayuhon ang re-routing sa summit

Niluwat og direktiba ang National Organizing Committee sa 12th Asean Summit aron sayohon ang pagpatuman sa re-routing sa mga PUJ nga mo-agi sa ceremonial route.

Matud ni Joey Abarri sa Citom nga gituyo kini tungod kay dunay ubang mga delegado sa summit ang moabot og sayo karong petsa 10 bisperas sa summit og gawas pa duna usay mga pasiunang kalihukan nga himoon nianang adlawa diha sa Cebu International Convenvtion Center (CICC).

Ang maong direktiba giduso ngadto ni Police Regional Office (PRO-7) director Chief supt. Silverio Alarcio og giduso usab ngadto sa traffic group alang sa hingpit nga implementasyon.

Gani ning mga higayuna nagsugod na pagpangabot dinhi sa Sugbo ang mga sakop sa International Media nga mo-cover sa ipahigayung summit.

Nasayran nga una nang gikasabutan nga ipatuman ang rerouting sa petsa 11 hangtud sa petsa 14 diin matapos ang upat ka adlaw nga summit.

Ang laing katuyoan niini aron mahatagan usab og igong kasayuran ang publiko aron makahimo kini og adjustment ilabina og likayan ang pagsuroy-suroy ning maong higayuna aron makalikay sa suliran sa trapiko.

Si mayor Tomas Osmeña una nang nipahimangnu sa publiko nga agwantahon ug antoson lang unya ang grabing suliran sa trapiko human usab gilibkas sa malakanyang ang deklarasyon sa upat ka adlaw nga holiday atol sa summit.

Padayo'g gibarugan ni Osmeña nga ang deklarasyon gyud unta sa holiday maoy makatabang pagpaminus sa suliran sa trapiko gumikan kay ang mga tawong walay trabaho makahigayon man kini pagbakasyon sa ilang tagsa-tagsa ka probinsya atol sa maong mga adlaw.