US Marine mi-rape ni Nicole gikonbikto

Usa sa tulo ka mga sakop sa U.S. Marines nga akusado sa paglugo sa 22 anyos nga dalagang Pinay nga si 'Nicole' sa Subic ang gikumbiktong mabilanggo og 40 ka tuig samtang ang tulo ka mga kauban niini naabswelto.

Si Lance Corporal Daniel Smith gikumbikto ni Makati City RTC Judge Benjamin Pozon sa branch 139 og 40 ka tuig nga mabilanggo ug gimandoan usab sa pagbayad og P100,000 nga danyos ngadto sa biktima.

Ang pagbasa sa hukom diha sa korte gitugutang koberan sa mga sakop sa media kagahapon ug gibutangan usab og daghang mga polis tungod sa mga nakitang mga militanteng pundok sa kababayen-an nga mipakitag suporta kang Nicole.

Unang gibasa ang pag-abswelto kanila ni Lance Corporals Keith Silkwood, Dominic Duplantis ug Staff Sergeant Chad Carpentier tungod sa kakulang og ebidensyang magduot kanila nga sila miapil sa paglugos apan gipahibalo sa korte nga dunay sinadistang pag-abuso nga nahitabo atubangan sa tulo.

Diha sa gawas, human basaha ang hukom nagyagaw ang mga tawong misuporta kang Nicole apan si Smith kinsa gipakita sa nagkadaiyang estasyunan sa telebisyon daw wala makahibalo kung unsay iyang gihuna-huna niadtong tungora samtang kini gilibutan sa mga security personnel gikan sa US Embassy.

Matud pa sa usa sa mga prosekusyon Evalyn Ursua nga gipakita lang sa korte nga dili sila madala sa pressure. Ang maong kaso maoy usa sa maisip nga grabeng kasong gikalambigitan sa mga abusadong sundalong Amerikano sukad pa niadtong 1960's diin kadaghanan niini naabswelto ang mga langyaw.

Si Nicole inubanan sa iyang mga kabanay nagsuot og itom nga bistida ug nagkawo ug nagsuot usab og dakong itom nga sunglasses, naghilak siya samtang gibasa pa ang maong hukom.

Nakalayat sa kalipay si Nicole dihang nadungog ang pagkumbikto kang Smith ug ingon man sa pagbasura sa korte sa petisyong nga naghangyong ikustodiya sa US embassy ang kombikto.

Ang paglugos nahitabo niadtong Nobiyembre 1 sa milabay'ng tuig diha mismo sa Subic Free Port human si Nicole nasobrahan og inom gisapwang ni Smith padulong sa girentahang van, si Smith ug Nicole mao ra miokupar sa luyong bahin sa maong van diin mahitabo ang paglugos.

Sulod paghusay sa maong kaso, kusganong mihimakak si Smith sa pasangil nga iyang gilugos si Nicole kundili ilang sinabutan ang nahitabo kanilang duha.

Gimando usab sa korte nga samtang wala pay nasabutan ang Pilipinas ug US sa Visiting Forces Agreement kabahin sa butangan sa mga makombiktong partisipante kung mamatud-ang nakasala samtang dunay military exercise nga gihimo anha una prisuhon si Smith sa Makati city jail.