Opisyal sa BIR mihagit ni Belleza

Opisyal sa Bureau of Internal Revenue (BIR) district office diha sa Tabunok, Talisay mihagit ni Bise Mayor Aberdovey Belleza kinsa tsirman sa traffic commission nga pamatud-an ang pasangil niini nga nakabuhat sila og kalapasan sa ordinansa sa siyudad tungod sa ilang pagbutang og koral daplin sa karsada.

Kahinumduman, si Belleza mipadala og suwat ngadto sa BIR niadtong Nobiyembre nga nagmando nga ipatangtang ang koral sa maong buhatan tungod kay nakahatag kini og kahasol sa mga mangagi ug nakalapas usab kini sa ordinansa sa siyudad.

Si Clotilda Menchavez, Revenue District Officer nagkanayon nga wala sila makalapas sa ordinansa sa siyudad tungod kay wala sila makabalda sa dagan sa trapiko ug pedestrian.

Gitataw ni Menchavez nga ang ilang gihimong improvised fence o koral gigamit nila sa pagprotekta sa mga sakyanan ug buhatan sa gobiyerno atol sa gabii.

Ang nahisgutang koral ibutang lang nila kada alas 10:00 sa gabii ug tangtangon usab nila kini kada alas 6:00 sa buntag.

Si Menchavez mibahad usab nga kun tangtangon ang ilang koral moduso siya og reklamo ngadto sa Ombudsman ug korte batok sa mopatangtang niini.