Pangilad sa Pasko ireklamo dayon — DTI

Gipasidan-an sa gobyerno ang publiko paglikay ug pagbantay batok sa mga negosyanteng mangingilad ning panahon sa Pasko.

Si Director Zaide Bation sa Department of Trade and Industry (DTI) nakadawat nag daghang reklamo kalabot sa mga nabiktima ning mapahimuslanong mga tindahan nga magtanyag og promosyon pinaagi sa "coupon".

Matud pa ni Bation nga base sa mga sumbong nga iyang nadawat, ang mga mangingilad nga tindera mangatang og kustomer unya hatagan dayon og tiket o coupon nga may numerong ipakiskis.

Inighuma'g kiskis ingnon dayon ang kustomer nga nakadaog siya og mga mahalong butang sama sa appliances ug uban pa.

Lingaw-lingawon og estorya ang kustomer hangtod nga imbis premyo nga libre unta, makombinse siyang bayuran niya ang butang, sa kwarta nga mahimong cash, tseke o kaha tinipigan sa bangko aron lang makuha kunohay ang premyo.

Apan kon sulaton ang presyo sa mang butang nga nakuha niya bisan wala niya unta kinahanglan, susama ra sa presyo nga naa sa display sa tindahan.

Matud pa ni Bation nga kini usa ka matang sa pagpangilad ug kinahanglang masanta kini.

Busa miawhag siya sa publiko nga kutob sa mabiktima, kinahanglang moduol sa iyang opisina uban ang ebidensiya sama sa coupon ug uban pa, ug timan-an gyud ang tindahan ug ang tindera o tagdumala kaha niini nga maoy nangilad kaniya.

Matud pa ni Bation nga gamiton niya ang gahum sa National Bureau of Investigation (NBI) aron nga masikop ang mga mangingilad ug mataral sa hukmanan.

Si Bation nagkanayon nga kasagaran ning buwan sa Disyembre daghan kaayong mga mangingilad nga mga negosyante nga mopakita og nagkalain-laing gimik aron makakuwarta.