11 mil ka pamilya way balay sa Talisay

Dunay sobra 11,000 ka pamilya sa dakbayan sa Talisay ang walay mga kapuy-an ug ang maong gipanglantawang mas modaghan pa sa umaabot nga mga adlaw.

Ang maong kasayoran base sa natala sa gipahigayong survey sa Socialized Housing Board niadtong 2003.

Si Mayette Abarquez, hepe sa Local Housing sa siyudad, nagkanayon nga ang siyudad aduna nay mga relocation site para kabalhinan sa maong mga pamilya.

Ang maong mga pamilya nagptukod og mga balay diha sa lote nga dili sila maoy tag-iya.

Kahinumduman nga ang siyudad adunay 13 ka relocation site og lima sa maong relocation site ang naukopahan na sa mga walay pinuy-anan.

Ang ubang mga relocation site ubos pa karon sa rehabilitasyon ug di pa gyud hapsay.

Matud ni Abarquez nga para mahimong beneficiary sa housing project kadtong walay mga balay moduol lang sa mga opisyal sa ilang barangay para matabangan sila og ang maong mga opisyal mao nay mo-coordinate sa buhatan sa Socialized Housing para ma-survey ang mi-aplay pagka-beneficiary.

Ang survey ipahigayon lang kini matag tulo ka tuig og sa sunod tuig, laing survey ang ipahigayon.

Gibutyag ni Abarquez nga certificate of no land holding lang ang rekisitos para mahimong beneficiary.

Ang Housing site sa Maghaway aduna na kini 195 ka beneficiary og sayo niining tuiga gidugangan og tukod og 23 ka unit sa balay ang maong lugar.

Ang maong housing site adunay livelihood training center, day care center, health center og water facility.