Langyaw'ng militante dakpon kun...

Panakpon ang mga militanteng langyaw nga mosalmot sa mga rally nga ilusad sa mga militante dinhi karong umaabot nga Asean Summit kun makit-an silang aktibong mosalmot sa mga anti-government protest.

Kini maoy gitug-an ni Chief Supt. Silverio Alarcio Jr., direktor sa Police Regional Office 7 kagahapon atol sa pakighinabi sa mga tigbalita human mibisita si Bureau of Immigration commissioner Al Fernandez sa iyang buhatan.

Matud pang Alarcio si Fernandez mipahibalo kanila nga dili mahimong aktibong mosalmot sa rally ang mga langyaw'ng militante tungod kay kalapasan kini sa kundisyones sa pagtugot kanilang makasulod dinhi sa Pilipinas.

"They are not allowed to participate actively in the rally because it is in violation of their visa here, I think this time we can't allow them anymore na pupunta ang mga foreigner tapos magsamok-samok," asoy pang Alarcio.

Matud pa sa opisyal nga dili sila did-an nga makauban sa panon sa mga raliyista basta di lang gyud sila mahimong magbitbit og mga placards, leaflets ug modiskurso sa entablado.

Giklaro sa opisyal dili pagyatak sa ilang katungod sa pagpadayag ang pagdili kanila apan gikinahanglang mosunod sila sa balaod sa nasud.

"They could express their freedom but they should not violate our laws, they should act according to what is allowed in their visa," asoy pa sa opisyal.

Sumala pang Alarcio nga ang pagbisita ni commissioner Fernandez kagahapon may labot sa pagpahibalo kanila kung unsaon pag-handle sa mga langyaw'ng militante lakip na niini ang pagdakop kanila kung dunay malapas nga kondisyunes sa ilang pag-anhi dinhi.

Posibleng imbestigahon ang madakpan ug ipa-deport dayon gawas sa nasud.

Apan usa sa mga opisyales sa Bayan Muna, nga si Arman Perez sa pakighinabi sa Banat News nagkanayon nga usa ka pagpakita og walay respeto sa kagawasan sa pagpadayag ang buhatan sa kapolisan kung dakpon ang mga bisitang militante.

" He is a law enforcer unya dili siya kabalo motahod sa kagawasan sa pagpadayag, everbody has an inherent right nga makapadayag, mas maayo siguro nga mo-read si Alarcio sa lagda sa international laws," asoy pang Perez.

Giklaro ni Perez nga ang mga militanteng langyaw nga mangabot igo ra mopakita sa ilang pakighiusa sa mga militante dinhi nga makaabot usab ang ilang mga sentimiyento sa gobiyerno.

"Moari sila diri para pagpakita in solidarity with our people's struggle against political killings and extrajudicial killings dinhi," pagklaro pang Perez.

Gibana-banang mokabat kapin sa 100 ka gatos nga mga militanteng langyaw ang gipaabot nga mosalmot sa 'summit' sa mga militante dungan sa Asean Summit dinhi.

Pipila kanila miabot na sa Manila sumala pang Perez ang kalihukan sa mga militante magsugod karong Disyembre 10 dungan usab sa pagpangabot sa mga heads of states sa mga nasud nga miyembro sa Asean.

Sa maong adlaw saulogon ang ika-59 ka tuig nga anibersaryo sa Declaration of Human Rights Covenant diin ang Pilipinas usa sa mga signatories niini.