Waiter patay sa disgrasya

Namatay ang waiter sa usa ka beach resort sa dakbayan sa Lapu-Lapu human madagit sa trak de karga nga naghakot sa gitabas nga tubo samtang nag-roadtest sa motorsiklo ug gikan nanagkot sa Bogo.

Ang aksidente nahitabo sa kurbadahong bahin sa National Road sa Ilihan, Tabogon alas 7 pasado sa miaging buntag.

Ang biktima mao si Fidel Bersabal, 33, ulitawo nga taga Mactan, Lapa-Lapu ug waiter sa Blue Water Beach Resort sa Maribago.

Si SPO1 Jonalito Saladaga sa Tabogon Police Station nga gikahinabi sa Banat News miingon nga gimaneho ni Rolando Villarojo Rabanes, 51 nga taga Sagay, Borbon, Cebu ang trak de karga nga nakadagit ni Bersabal.

Matud pa ni SPO1 Saladaga nga nagkasugat ang motorsiklo ni Bersabal ug ang trak de karga nga gimaneho ni Rabanes sa paghidangat niini sa kurbadahong bahin sa Ilihan.

Nalagpot si Bersabal ug napantok ang ulo sa karsada ug nabilwa pa ang paa niini nga maoy nakaingon sa hinanali niining kamatayon.

Ang motorsiklo ni Bersabal nalatayan sa ligid sa trak de karga nga nakabaton usab og grabeng kadaot.>

Si SPO1 Saladaga miingon nga ang suspetsado kinsa mitahan ngadto kanila human sa maong aksidente gitanggong karon sa detention cell ug nagpaabot nga pasakaan og kaso.