Dumpit abagan ni Tomas aron di mataktak

Gipasalig ni Mayor Tomas Osmeña nga iyang himuon kutob sa iyang mahimo aron katabangan ang kontrobersiyal nga si SPO1 Adonis Dumpit nga nag-atubang karon og summary dismissal sa National Police Commission (NAPOLCOM).

Kini may labot sa kasong murder nga giatubang ni SPO1 Dumpit gumikan sa pagpatay sa suspetsadong tulisan nga si Ron-Ron Allosada Go nga napatay sa iyang pinuy-anan didto sa Sityo Sampaguita Villagonzalo-II, Tejero niadtong tuig 2004.

Apan gibutyag ni Osmeña atol sa press conference kagahapon sa udto nga paningkamutan niya nga magpabilin sa katungdanan si SPO1 Dumpit pinaagi sa pagtabang aron makalingkawas kini sa maong kaso nga giatubang.

Ang unang gipasalig sa mayor mao ang paghatag og libreng abogado nga makadepensa kaniya sa korte.

Giklaro sa mayor nga dili lang si SPO1 Dumpit maoy iyang gitabangan kun dili maghatag usab kini og pagdasig ngadto sa kapolisan aron seryusong mopatuman sa ilang gimbuhaton gumikan kay duna may motabang kanila og depensa sa higayon nga makasugat og kakulian subay sa ilang pagpatuman sa trabaho.

Giklaro sa mayor nga lahi ang sitwasyon ni SPO1 Dumpit kun itandi niadtong mga polis nga nagpabadlong sama niadtong nalambigit sa mga kasong korupsiyon ug uban pang anomaliya nga gipasidan-an usab ni Osmeña nga dili usab siya magduhaduha paggukod niini.

Si Osmeña mibilib sa gipakitang ka-agresibo ni SPO1 Dumpit sama sa paggukod batok niadtong mga notadong kriminal ug tulisan nga mohimo og mga dautang buhat dinhi sa dakbayan.