Mga residente mag-rally vs. mga opisyal sa barangay

Gitakdang molusad og protesta ang dili mominos usa ka libo ka mga nagpakabanang molupyo sa Basak San Nicolas batok sa mga opisyal sa ilang barangay karong buntag.

Gibutyag ni Gregory Libron, kanhi barangay secretary sa Basak San Nicolas, nga ilang kwestyonon ang pagsige lang og usik-usik sa ilang mga opisyal sa pundo sa barangay nga walay klarong gigastuhan apan gipasagdan lang niini ang ilang mga basic services.

Gitumbok ni Libron dihang nahinabi sa Banat News ang pagpahigayon og lakbay aral nila ni Kapitan Mario Susaya ug mga konsehal niini apil na ang SK-chairman didto sa siyudad sa Davao nga migasto og P300 mil.

Matud ni Libron daghang mga molupyo ang mipasalig nga moapil sa himuon nilang protesta karong buntag diha atubangan sa barangay hall aron kwestyonon nila ang gihimo karon sa ilang mga opisyal.

Matud ni Libron nga niadtong niaging tuig nag-lakbay aral usab ang mao nilang mga opisyal didto sa Palawan ug dul-an gihapon sa P300 mil ang nagasto niini gikan sa pundo sa barangay.

Gibutyag niya nga hangtod karon wala gyuy mga tambal sa ilang health center nga mapahimuslan unta sa mga molupyo nga masakit ingon man problema usab sila sa tubig nga wala matagad tungod sa pagsige lang og suroy-suroy sa ilang mga opisyal.

Sayo karong tuiga si Libron mao usay miabag sa mga nagpakabanang molupyo sa maong lugar nga mipasaka og siyam ka counts nga kasong korupsiyon batok kang Susaya ug sa mga konsehal niini nga pending karon sa Ombudsman Visayas.

Wala hinuon makuhai sa ilang habig si Susaya ug ang mga konsehal niini gumikan kay atua pa kini sa Davao ug gitakdang mopauli dinhi sa dakbayan kagabii o karong adlawa.