Polis naangol atol sa demolisyon sa M'daue

Nagubot ang demolisyon sa kabalayan sa sitio Anakma, Pagsabungan dakbayan sa Mandaue kagahapon sa buntag human mosukol ang mga residente sa mga demolition team ug mga polis.

Base sa nasaksihan sa Banat News gibato og mga botelya ug bato ang mga sakop sa demolition team ug kapolisan sa presinto 3 human kini buot mosud pagbalik sa ilang ikaduhang adlaw nga demolition sa maong dapit kagahapon sa buntag.

Gumikan sa maong tensiyon tali sa Nagkahiusang Kusog ug Kabus sa Pagsabungan ko n NKKP, mga residente sa maong dapit ug sa mga sakop sa demolition team, ubay-ubay ang nasamdan ug gani dunay mga polis nga samaran.

Ang demolisyon maoy ikaduhang hugna sa pagguba sa 18 ka panimalay nga naapektahan sa writ of execution nga giluwatan ni RTC Branch 1 Hon. Judge Rogelio Lucmayon diin giimplementar ni Ceasar Seno ang sheriff sa RTC branch 1 ug mga sakop sa kapolisan sa dakbayan sa Mandaue.

Si Raul Ruiz nga maoy presidente sa Anakma nga gikahinabi sa Banat News miila sa polis nga naangol nga mao si PO1 Jimmy Berdegon nga sakop sa field training police sa Presinto 3 sa barangay Basak.

Matud pa sa mga sakop sa NKKP pinaagi ni Felix Andilab nga bugtong lamang ang kopya sa titulo sa yuta nga giangkon ni Thelma Perez ang ilang gikinahanglan ug boluntaryo sila nga mamahawa sa maong dapit, apan wala kini makapakita niini kanila hinungdan nga sila nagduda nga gimaneho ang maong kaso ngadto sa korte.

Matud pa ni Ceasar Seno, ang Sheriff sa RTC branch 1, dugay nang higayon nga ilang gihatag sa mga residente human ang MTCC mihatag og pabor ngadto kang Thelma Perez, ang petitioner niadtong Pebrero 8, 2006 ug gani aduna na usab kini hukom gikan sa 3rd division sa Supreme Court nga pabor gihapon kang Perez.

Gumikan niini miluwat og Writ of Execution si Judge Lukmayon niadtong Mayo 10, 2006 apan gumikan sa pagmagahi sa mga residente sa maong dapit napugos sila sa paghimo sa maong demolisyon diin gisugdan niadtong milabay'ng adlaw.

Human sa tensyon mihangyo kang Pagsabungan Barangay kapitan Cerilo Congson ug Mandaue City Mayor Thadeo Ouano sa pagtabang ang mga molupyo.

Nakahukom si Seno nga ihunong una ang demolisyon aron paglikay sa dugang panagsakitay.