BBRC inmates gibalhin na ngadto sa Kalunasan kagahapon

Nahinayon ang pagbalhin sa mga piniriso sa Bagong Buhay Rehabilitation Center (BBRC) gikan sa Apas ngadto sa Bag-ong bilanggoan sa Kalunasan kagahapon sa buntag.

Napulo ka mga PUJ ang giabangan sa Bureau of Jail Management and Penology aron hakuton ang dul-an sa 800 ka mga priso kagahapon tungod sa giingong wala mosugot si mayor Tomas Osmeña nga gamiton ang mga bus sa dakbayan alang niini.

Ang mga sakop sa Mobile Patrol Group, Special Weapons and Tactics, pito ka dagkong motorsiklo ug 16 ka mga sakop sa Special Action Force lakip na ang dugang pwersa gikan sa laing rehiyong sakop sa BJMP maoy gitahasan sa pagbantay ug mao usab ang nahimong convoy paingon na ngadto sa bag-ong BBRC.

Samtang si Kalunasan Barangay kapitan Francisco Pintor nga na-interview sa Banat News kagahapon sa iyang barangay hall miingon nga dili siya makapasalig nga makasuporta sa tubig sa bag-ong bilanggoan.

Sa higayon nga madaot ang reservoir sa iyang barangay wala kini ikahulip nga back-up nga laing water system nga mosuplay.

"Sa akong nahibaw-an duna may gigahin nga pundo si Presidente Gloria Macapagal Arroyo aron ipatrabaho ang water system sa BBRC," dugang asoy niya.

Si BJMP officer-in-charge General Antonio Cruz nga gikahinabi sa Banat News kagahapon kinsa maoy nangunay sa pagsuperbisa sa pagbalhin mitug-an nga duna na silay source nga makuhaan og tubig ug makigsabot usab sila sa kadagkoan sa DPWH aron pagplastar niini.

Matud pa niya mas paborable ang seguridad sa Kalunasan kung itandi sa Apas tungod kay kasikbit ra nila ang duha pa ka dagkong prisuhan sa dakbayan.

"Mas secure dito with fence, saka may malapit na mga jail facilities, for the water problem, alam na natin nga basic necessity iyan kaya we have plans for it, we have already pinpointed the source," asoy pang Cruz.

Ang mga priso gibutang sa duha ka andanang bag-ong edispisyo nga masudlan og 900 ka priso sa pagkakaron ug kung mahuman na ang pikas nga edipisyo ibalhin usab og anam ang mga priso ilabi na ang mga dunay kaso sa iligal nga drogas.

Ang BBRC dunay 2,463 ka mga priso diin sila nagdasok sa edispisyong gidesinyo lang para sa 250 ka mga tawo.