Luna sa Norkis gitugyan na

Ang luna nga gigamit sa Norkis Display Center sa dalan Plaridel sa Centro, Mandaue pormal nang gibawi sa kagamhanang lokal sa Mandaue kagahapon sa buntag didto sa Plaridel St. Brgy. Centro Mandaue.

Ang pag-take over sa kagamhanang lokal sa Mandaue kagahapon gipanguluhan mismo ni Mayor Thadeo Ouano, uban nila ni City Legal Officer Erwin Gerosa nga maoy naghatod sa Notice of Recession of Contract ngadto sa management sa Norkis.

Matud pa ni Gerosa nga ang mayor adunay katungod sa pagbawi sa luna nga iya sa siyudad tungod sa nalapas sa Norkis sa nabutang nga lagda diha sa kontrata.

Base sa kontrata nga gilagdaan sa kanhi mayor sa dakbayan sa Mandaue ug sa Norkis, magbutang ang maong kompaniya og parks ug playground sa 1.6 hektarya nga luna sa naasoy'ng dapit, apan gihimo sa Norkis nga display center sa ilang mga sakyanan ug gikoral pa kini.

Matud pa ni Ouano nga iyang himuong temporaryong grahian sa mga sakyanan ug heavy equipment nga iya sa dakbayan sa Mandaue ang maong luna. Papuy-an usab sa mayor sa mga augmentation force sa kapolisan nga nadestino sa Mandaue atol sa Asean summit.

Human sa Asean summit, matud pa ni Ouano, posibleng iyang sugdan ang pagpatukod sa Mandaue City College building. Hangtod karon, nagkatibulaag ang mga tinun-an alang sa ilang pagtuon tungod kay walay edipisyo nga iya sa maong kolehiyo.

Si Ouano miingon nga kun adunay lakang nga mopasaka og kaso ang Norkis gumikan sa ilang pag-take over, andam sila nga moatubang niini.

Atol sa pag-take over sa kagamhanan sa Mandaue, walay usa ka representante sa Norkis nga mitambong. Naninguha apan pakyas ang Banat News pagkuha og habig sa mga tagdumala sa maong kompaniya.