Negosyante wa kabunot sa .45, patay

Tag-iya og water refilling station wala makabunot sa kalibre .45 nga pistola nga iyang gitakin sa dihang gipusil patay sa duha ka nag-motorsiklo didto sa Sitio Locatha, Looc, Lapulapu sa milabay'ng gabii.

Ang biktima mao si Susano Betoty Basubas, 46, minyo ug nagpuyo sa maong dapit, negosyante og water refilling station ug apartment sa maong dapit.

Base sa pasiunang imbestigasyon ni PO3 William Homoc sa Homicide Section sa Lapulapu Police Office nasayran nga samtang naglakaw si Basubas gikan sa iyang apartment paingon ngadto sa iyang water refilling station kalit lang kini nga gibabagan sa duha ka tawo nga nagsakay og motorsiklo.

Sa walay daghang pangutana, gipusil si Basubas tumong sa iyang ulo nga maoy hinungdan sa iyang pagkahagba ug pagkamatay dihadiha nga wala na madala sa tambalanan.

Atol sa paghiling sa mga sakop sa Homicide Section, nasuta nga nagtakin si Basubas og kalibre .45 nga pistola si Basubas, lakip na ang pito ka mga bala niini, usa ka extra magazine nga dunay sulod nga pito usab ka bala ug mga papeles sa paghupot og armas.

Matud pa ni PO3 Homoc hugot nilang gitutokan ang motibo sa daang panagbangi ug "love triangle" sa maong insidente.

Si PO3 Homoc miingon nga posibleng dunay daang hulga sa iyang kinabuhi si Basubas gumikan kay mipalit kini og armas niadto pa lang bulan sa Oktubre.

Dugang pa ni PO3 Homoc nga subayon usab ang bag-o lang nga panagbulag ni Basubas ug sa iyang asawa nga si Allieta Basubas.

Hinoun tanang anggulo ang ilang subayon aron sa paghatag og hustisya sa kamatayon ni Basubas.