Ang lima pulos nakahukom nga mosurender ug mobalik na sa sabakan sa balaod aron magsugod og bag-ong kinabuhi uban sa ilang pamilya ug mga anak.
Ang lima giila nga sila si Ranulfo Doydora, 40, minyo, alyas Ka Binggo, taga Inugbuhan, Pilar, Bohol, Francisco Payot, 46, minyo alyas Ka Amado taga Sta. Cruz Batuan, Sopronio Labadan, 54, minyo alyas Ka Dimudlaw, taga San Isidro Siera Bollunes, Antonio Moring, 29, minyo, alyas Ka Junrex taga Cagong-Cagong, Alicia ug Bernard Banal. Ang lima pulos mga mag-uuma didto sa ilang lugar.
Ang lima mipadayag sa ilang nagkalainlaing kasinatian sa dihang aktibo pa sila nga miapil sa walhong pundok.
Usa sa ilang mga rason mao nga gigamit lang ang ilang panahon sa maong pundok ug ilang pamilya nga nabiyaan sulod sa pipila ka tuig.
Si Labadan miingon nga upat siya ka tuig misulod pagka rebelde sugod niadtong 1992 ug nahimong chairman sa pundok sa mag-uuma didto sa Siera Bollunes.
Apan iyang gihimakak nga nalambigit siya sa pakiggubat batok sa tropa sa mga militar.
Matud niya nga siya maoy nag-organisar sa maong pundok ug tighatag sa mga impormasyon ngadto sa iyang mga kaubanan sa bukid.
Sa iyang bahin, si Ka Binggo miangkon nga usa siya sa tigsuporta sa mga rebeldeng NPA didto sa ilang lugar niadtong 1982 kinsa niadtong higayona duha niya ka igsoong lalaki pulos miyembro sa NPA.
Gibutyag niya nga nahurot og kamatay ang duha ka igsuon human sa engkuwentro batok sa mga militar.
Matud niya nga misulod siya sa walhong pundok niadtong 1985 ug napiling chairman sa propaganda organizing team sa ilang lugar.
Samtang si Payot mitug-an nga miapil siya sa maong pundok niadtong 1998 human ang iyang giugmad nga yuta iyang naprenda dihang dunay nasakit sa iyang pamilya.
Gikumbinser siya nga motipon ug gipasaligan nga makuha ug mabalik niya ug bahi-bahinon ang maong yuta.
"Diha na ko nahaylo sa ilang gisaad kanako kay gisigihan kog balik-balik sa amoa mao to nga nakahukom gyud ko nga motipon na lang," dugang asoy niya.
Matud niya katulo ka higayon siya naka-encounter og gubat sulod sa upat ka tuig niyang pagka rebelde ug dihay higayon nga dunay masamdan sa engkuwentro patyon ug tiwasan kini sa ilang kumander o ba kaha suguon ang team leader sa pundok.
Nakadawat usab siya og hulga sa kinabuhi gikan sa mga kauban sa pundok human masayod nga nagplano silang mobalik sa sabakan sa balaod.
Si Moring nahimong sakop sa walhong pundok niadtong 1999 ug misurender niadtong April 1, 2005.
Siya maoy tigpamaba sa Anakbayan ug Anakpawis ug iyang giangkon nga nakaapil siya og rally sa dalan Colon pipila ka tuig ang nakalabay.
Matud niya siya maoy nagdala sa mga campaign materials sa Anakpawis panahon sa kampanya dinhi sa Sugbo sa milabay'ng eleksyon.
Nasayran usab nga kasagaran sa ilang himuon mao ang isyu ang kanunay pagsupak sa pamunoan ni Pres. Gloria Arroyo aron maglagot ang katawhan.
Si Moring nanawagan sa ubang pundok nga dili masulbad ang insurhensya kun ipaagi sa pakiggubat ug wala usab kini maayong padulngan kun magpadayon sa dili pagsinabtanay.
Ang pamunuan ni Gobernador Erico Aumentado migahin og pundo nga P2,500 nga financial assistance ug laing 2,500 nga livelihood alang sa lima nga kanhi rebelde.
Si Lt. Col. Lasangue nanghinaot nga sundon sa uban ang hukom sa lima nga mibalik na sa sabakan sa balaod.