Imbestigasyon vs hepe milaban sa uyab sugdan na

Ang hepe sa Provincial Internal Affairs Service sa Cebu Provincial Police Office nagpaabot nga maduso na sa Provincial Intelligence and Investigation Branch sa ilang buhatan ang pormal nga reklamo batok sa hepe sa Aloguinsan nga si P/Insp. Edgar Almaden aron masugdan na nila ang imbestigasyon. Si Supt. mibutyag nga si Insp. Almaden posibleng mag-atubang og ubay-ubay nga kaso apan igo lang siya morekomendar sa Police Regional Office 7.

Iyang nakita nga legal ang operasyon ug walay nahimong kalapasan ang tulo ka mga polis sa PIIB nga midakop sa uyab ni Almaden nga si Rosalyn Dosdos kinsa nag-atubang og duha ka kaso sa korte.

Matud niya nga ang asawa ni Almaden nga si Rhodora mipakita sa iyang buhatan ug nakig-istorya nga andam kining mopasaka og reklamo batok sa iyang bana.

Dugang pang Ardaniel nga mitug-an kaniya ang asawa nga dugay na untang masikop si Dosdos sa kapolisan apan gikatahong gitago-tagoan kini sa higayon nga kini dakpon.

Kahinumduman niadtong Biyernes sa gabii nga sila si SPO1 Kenneth Abella, PO2 Zeusito Veloso ug PO2 Artemio Tumakay pulos sakop sa PIIB, mi-serve og warrant of arrest batok kang Dosdos, 24, nga taga Lamintak Sur, Medellin.

Apan gikatahong si Almaden ubos sa impluwensya sa ilimnong makahubog ug giingong misuway og babag ug mihangyo sa mga polis aron dili dakpon ang iyang hinigugma kay natunong kini nga walay opisina sa gobyerno ug dili makahatag og piyansa.

Milanat og 30 minutos ang negosasyon nga madala sa mga polis si Dosdos.

Tuod man dihang nagdagan ang sakyanan paingon na dinhi sa PIIB pag-abot sa Bonbon Aloguinsan gikatahong mibunot si Almaden sa iyang armas ug gition ni PO2 Veloso nga maoy nagmaneho sa sakyanan.

Napugos si PO2 Veloso sa paghunong.

Lain na usab ang 30 minutos nga negosasyon sa mga polis ug ni Almaden aron lang mokalma ug isurender ang armas.

Si Dosdos nag-atubang og duha ka kaso sa korte, oral defamation ug grave threat nga gipasaka ni Rhodora.

Sa nasayran, si Almaden giapubos sa camp restriction samtang nagpaabot sa himuong imbestigasyon sa PIAS.