Gipatay tungod sa yuta

Patay ang usa ka hamtong nga lalaki human dunggaba sa iyang silingan samtang nag-inom sa usa ka tindahan sa miaging gabii pasado alas 8 ang takna sa San Isidro Asturias.

Ang biktima giilang si Julito Cabuntagon, hingkod ug nagpuyo sa maong dapit.

Ang gitumbok nga midunggab naila nga si Gomer Trocio, hingkod, minyo ug silingan sa biktima.

Segun sa report nga midangat saProvincial Police nasayran nga ang biktima uban sa usa niini ka kauban nakig-inom ug ilimnong makahubog sa usa ka tindahan sa maong lugar.

Ang suspek kalit lang miabot sa tindahan ug miapil ug inom sa biktima.

Sa tanto nilang panag-inom mitumaw ang panaglalis tali sa bikitma ug suspek bahin sa yuta hangtod nga misangko sa mainiton nga panaglalis ug miresulta sa pagpanunggab.

Ang suspek mikuha og kutsilyo dayong duslak ngadto sa tiyan sa biktima.

Human sa maong hitabo daling misibat ang suspek palayo sa lugar samtang ang biktima daling gihatod sa Balamban District Hospital apan patay nang nidangat sa maong tambalanan.

Ang mga polis daling miresponde sa dapit apan wala na madakpi ang gikatahapan.

Si PO3 Dennis Nocos mitug-an sa Banat News kagahapon nga ang suspek dili pa lang dugay niabot sa maong lugar gikan sa Davao kinsa ang pamilya niini didto na manimuyo.

"Sa akong nadunggan nga dunay panagbangi sa yuta ang hinungdan sa pagpanunggab kay diha kuno ni nagsugod ang lalis, di pa man dugay naabot ang suspek gikan sa Davao. Mao ni among susihon sa among imbestigasyon diha gyud nagsugod."

Nagtuo si PO3 Nocos nga nakabiya na sa Asturias ang suspek apan mag-atubang lang gihapon ug kasong pagpatay ug posibling ilang ipasaka ang kaso karong hapon sa Provincial Prosecutors Office sa kapitolyo.