Kini maoy iyang gipamahayag sa mga tigbalita atol sa iyang regular nga press conference sa iyang buhatan.
Matud pa sa gobernador nga ang CICC magamit na gyod atol sa Asean Summit ug makataak gayod ang tanang ministro nga delegado sa maong lugar.
Kini sukwahi matud pa sa pamahayag sa usa ka komentarista sa radyo ug pamantalaan nga nagsige og panaway sa CICC nga kini dili gayod magamit ug nag-usik-usik lang sa kwarta sa gobyerno.
Gidugang pa sa gobernador nga dili usab tinood ang mga pamasangil kaniya nga nagkabuang siya pangitag laing kontraktor nga ikapuli sa iyang pagpataod sa aircondition unit sa CICC tungod kay ang Alenaire Cebu Inc. maoy mipadayon niini pinaagi ni Luis Moro III, ang manager nga maoy mismong nangunay.
Tungod sa maong mga pamasangil kaniya, personal gayod nga giimbita ni Goberador Gwendolyn Garcia ang mga sakop sa media ug didto nakita ug nasusi nga ang CICC gamay na lang gayod kulang matapos ug gani ang aircondition unit nag-andar na ug nasinati na ang kabugnaw.
Giduaw usab sa mga sakop sa media ang International Media Center ug nakita nga nakataod na ang mga tv monitor para sa nagkalain-laing media outlet, og unya ang conventional hall gisugdan na ang pagbutang sa carpet.
Gumikan nining kalambuan, ang gobernador naghangyo nga tapuson na kining kanunay nga panaway sa katukuran sa CICC ug ang pagkanunay'g tan-aw sa adlaw ug petsa kanus-a gayod kini mahuman.