Cardinal Vidal pasubhon sa CICC sa Dec. 8

Gipahibalo kagahapon ni Gobernador Gwendolyn Garcia nga karong umaabot Disyembre 8 na ang iyang gikatakdang pagpabendisyon sa Cebu International Convention Center kang Arsobispo sa Sugbo Ricardo Cardinal Vidal.

Matud pa sa gobernador iya mismo nga imbitahon ang arsobispo sa Sugbo nga maoy mobendisyon sa CICC. Gidugang pa sa gobernador nga ang petsa otso sa Disyembre ang iyang gipili kay kini usa ka makahuluganong adlaw sa simbahan nga mao ang kapistahan sa Inmaculada Concepcion.

Giuna niya kini og pahibalo aron nga masayran sa iyang mga kritiko nga matapos na gayod sa dili madugay ang CICC ug magamit kini panahon sa Asean summit.

Tungod niining kalambuan, malaumon siya nga panahon sa pagbendisyon sa CICC ang tanan motan-aw na og positibo sa mao nga proyekto ug maghiusa alang sa dakong dungog sa Sugbo nga dinhi himuon ang mao nga summit ug sulod lang sa walo ka bulan natapos kini.