'Ciudad' gisubhan gahapon

Gisubhan kagahapon ang Ciudad, ang town ug entertainment center nga gipaila karong bag-o sa lalawigan sa Sugbo.

Nahimutang ang Ciudad sa kanhi Cebu International School sa Banilad nga karon nabakante tungod sa pagbawi sa maong luna sa kagamhanan sa lalawigan.

Si Gobernador Gwendolyn Garcia nangulo sa mga opisyal sa lalawigan pagpangunay og subo sa maong bag-ong proyekto. Uban niya sila si Bokal Victor Maambong, Agnes Magpale, Teresita Celes, Atty. Pablo John ug ang kadagkoan sa Fifth Avenue Property Development Corp. nga maoy gitahasan sa pagpalambo sa Ciudad.

Gipakita ni Arkitekto Danny Silvestre ang blueprints sa Ciudad ug gipakita sa video ang umaabot nga dagway niini.

Si Garcia mipasabot nga ang Ciudad magsilbe nga "replica" kon kopya sa kinatibuk-ang Sugbo sa karaang panahon ug sa kasamtangang panahon.

Magsilbi na unyang suroyanan ang Ciudad ug dinhi makita sa mga bisita ang karaang Calle Colon, Plaza del Sol, Plaza dela Luna ug ang Power Center Zone diin anha ipahimutang ang mga supermarket, bookstore, hardware, appliance center, botika, sinehan, kalingawan, internet café, bingohan bangko ug uban pa.

Ibutang usab dinhi ang Mercadillo Museo de Cebu, health ug wellness center, ug hotel.

Si Silvestre mipasabot nga daghang nga negosyante ang maka-interes nga mobubo og puhonan sa Ciudad. Gani, daghan na og nagpa-reserba og mga stall.

Si Garcia miingon nga ang maong proyekto makadungag unya sa kita sa kagamhanan sa lalawigan.

Si Rdo. Padre Eduardo Bentic maoy mibendisyon sa cornerstone diin gibutang sa kapsula ang mga sensiyo, rosaryohan, ug tulo ka pamantalaan sa Sugbo.