Pasko sa V. Rama sugdan sa Dec.1

Aron pagpakita sa barangayan, bayanihan ug bolunterismo subling buksan sa kagamhanan sa siyudad sa Sugbo ang tinuig nga kalihukan sa "Pasko sa V. Rama" karong Disyembre 1, adlaw'ng Biyernes.

Kagahapong adlawa mipatawag og press conference ang Rotary Club of Guadalupe aron ipahibalo ang entry ug sa Cluster Decoration Contest ngadto sa mga molupyo sa dalan V. Rama gikan sa Guadalupe Church hangtod na sa Calamba ug San Nicolas Proper.

Ang siyudad sa Sugbo migahin og sobra sa P300 mil alang ning maong kalihukan karong tuiga nga magdasig sa pagtinabangay sa mga molupyo sa maong lugar aron ipakita ang labing nindot nga dekorasyon sa Pasko sa tibuok dalan V. Rama.

Ang makadaug sa Decoration Contest sa unang ganti makadawat og P20 mil plus trophy, P15 mil sa 2nd prize, P10 mil sa 3rd prize og tagsa ka libo ka pesos nga consolation prize sa matag cluster.

Samtang sa cluster decoration contest makadawat og P15 mil ang makadaog sa unang ganti, P10 mil sa 2nd prize, P5 mil pesos sa 3rd prize ug tagsa ka libo ka pesos nga consolation prize.

Sa best house decoration contest makadawat og P5 mil sa unang ganti, P3 mil sa 2nd prize, P2 mil sa 3rd prize ug dunay pulo ka consolation prize nga tagsa ka libo ka pesos matag usa.

Samtang sa labing unang higayon dunay kompetisyon alang sa mga establisemento nga nahimutang sa dalan V. Rama apan walay salapi nga ihatag tungod kay hatagan lang kini og plaque ang mananaog.

Matud ni Bise Mayor Micheal Rama, over-all chairman sa Pasko sa V. Rama nga ang maong kalihukan gitumong pagpakita sa espiritu sa pagtinabangay ug kooperasyon dili lang sa mga molupyo sa dalan V. Rama kun dili ngadto sa tanang mga Sugboanon panahon ning kasaulogan sa Pasko.

Sugod karong Disyembre 1 ang tanang mga entries gikinahanglang makompleto na og butang sa kadalanan hangtod sa Enero 17 atol sa Sinulog mardi gras.

Apan ang paghukom sa mogawas nga mananaug sa maong kompetisyon ipahigayon unya sa Disyembre 16.