Habal-habal di mosanong sa CITOM

Wala tagda sa mga drayber og "habal-habal" ang pagsalikway sa mga abogado sa City Traffic Operations Management (CITOM) nga maligalisar ang ilang pagpamasahero dinhi sa dakbayan.

Ang mga drayber og habal-habal mopadayon gihapon sa pagpamasahero diha sa mga hilit nga dapit, ilabi na paingon sa lainlaing destinasyon sa kabukiran, bisan og did-an na sila sa mao nilang operasyon.

Nabantayan nga lisud usab kaayong mapakgang ang kalihukan sa mga drayber og habal-habal kay kuwang og mga sakop ang Citom nga idistino diha sa mga dapit nga nag-operate kining mga motorcycles-for-hire.

Si konsehal Jose Daluz misugyot unta og ordinansahon nga magligalisar sa operation sa mga habal-habal, apan ang abogado sa Citom nga si Rico Abellanosa mipasabot nga supak sila kay apektado ang operasyon sa mga legitimate transport operators.

Ang mga drayber og habal-habal nga nag-operate diha sa ubos nga bahin sa Marco Polo Plaza Hotel paingon na sa bukirang bahin sa dakbayan, ug kadtong anaa diha sa barangay Buhisan, miingon nga bisan og wala itugot sa balaod ang ilang trabaho apan usa kini ka tinarong nga paagi.

Ang kagamhanan supak sa pagligalisar nga ang mga motorsiklo magamit isip pamasaheroan, kay peligro kini kaayo labi na og pasakyan kini og unom ka tawo walay labot sa drayber.

Bisan og peligro kaayo, apan daghang mga tawo ang mapugos sa pagsakay sa habal-habal kay wala man sila'y kasakyan paingon sa mga hilit nga dapit. Ang habal-habal nag-operate bisan sa ubang dapit sa nasud.