Mabdos gipusil

Napusilan patay ang usa ka unom ka buwang mabdos human kini miulang sa away sa iyang bana sa iya rang mga kainom diha sa Agus, dakbayan sa Lapu-Lapu sa milabay'ng hapon.

Giila ni SPO2 Nicanor Bacayo ang napatay nga mao si Reyna Calumba Colita, 25, minyo, lumad sa maong dapit ug naangol usab ang iyang banang si Percy (bana ni Reyna) ug usa ka manindahay og taho nga si Oliver Arong, mga legal ang panuigon nga nanimuyo usab sa maong dapit.

Gitumbok nga maoy nakapusil kanila mao sila si Virgil Mendaros alyas Omeng, 35 minyo, Normito Rosal, 45 minyo ug Severo Mendaros, 46 minyo mga silingan ra usab sa mga biktima.

Base sa pasiunang imbestigasyon ni PO3 Manolito Abellanosa sa homicide section sa kapolisan sa dakbayan sa Lapu-Lapu, nasuta nga didto nagsugod ang lalis sa dihang mibisita ang magsuong Mendaros ug Rosal sa panimalay ni Colita.

Matud pa sa mga polis, dunay nahibiling bino si Percy diha sa iyang balay ug bisan walay pananghid, giinom kini sa mga suspek hinungdan sa mainitong panaglalis tali ni Percy ug Virgil. Nianang tungora wala makabantay si Percy nga mipunit og kongkretong bato si Mendaros ug gihapos kini ngadto kaniya.

Nianang tungora, si Reyna pagkakita sa nahitabo sa iyang bana nga gitabangan og kulata miduol aron panalipdan ug ulangon ang away apan usa sa kauban ni Mendaros ang kalit nga mibunot og armas dayong pusil ngadto ni Reyna.

Si Reyna naigo sa ulo ug gideklarar nga dead on the spot samtang sa dughan usab ug ubang parte sa kalawasan ang samad pinusilan ni Percy ug Arong ug parehong nalandig sa VSMMC.

Wala na usab maabti sa kapolisan ang magsuong Mendaros ug Rosal sanglit dali silang misibat dayon human sa maong krimen ug padayon pa ang imbestigasyon sa maong kaso.