Boksing suportado sa hunta probinsyal

Tungod sa kadaugan ni Manny "Pacman" Pacquiao niadtong milabay nilang away sa Meksikanong Erik Morales sa ikatulong hugna didto sa Las Vegas, sila si Bokal Carmiano Kintanar, Victor Maambong ug Bokal Martin Calderon mopasa og usa ka resolusyon karong Lunes sa hunta probinsyal nga mag-awhag sa Philippine Sports Commission nga suportahan gayod ang programa sa sports kabahin sa boxing sa nasod.

Kini human ilang nakita ang pagpaningkamot ni Pacquiao isip usa ka boksingero nga miabot ngadto sa iyang pagkainila gikan sa iyang pagka ordinaryo nga tawo gikan sa General Santos City.

Matud pa ni Kintanar, Maambong ug Calderon nga angayan lamang nga kining programa sa pamoksing nga nakahatag na kanato og dakong dungog hatagan og dakong suporta sa gobiyerno.

Lain usab nga ilang rason mao: nga daghan sa mga batan-on karon ang may potensyal sa boksing apan wala lamang kini mapadayon tungod sa kulang ug suporta sa lokal nga pangagamhanan.

Mao nga matud pa sa tulo ka bokal nga usa sa unod sa ilang resolusyon mao ang pag-awhag sa matag lokal nga pangagamhanan sa pag-ila sa mga batan-on nga mahilig sa boksing ug pagsuporta kanila.

Gidugang pa nila pag-ingon nga pinaagi niining pagsuporta sa mga batan-on nga may talento sa pamoksing mawala na unya ang inpluensiya sa drugas nga maoy sagad sa problema karong panahona.

Tungod niini sila malaumon nga ang ilang mga kaubang bokal mosuporta usab kanila ug ang mao nga resolusyon mapadalhan og kopya ang buhatan sa Philippine Sports Commission ug ang buhatan sa atong presidente sa nasud alang sa dugang nga inpormasyon ug konsiderasyon.