Lalaki gipatay sa Tejero

Patay ang usa ka lalaking gidudahang nalambigit sa drogas human kini pusila sa nag-inusarang wala mailhing lalaki diha sa eskina sa dalan Alviola ug Boreles sa Villagonzalo Dos sa Tejero ning dakbayan kagahapon sa buntag.

Ang biktima giilang si Lemuel Ermac, alyas Nognog, 49, residente sa maong dapit kinsa gipusil makadaghang higayon diha sa iyang kalawasan.

Ang suspek gikatahong nakit-ang nagtiniil ra ug gibana-banang 5'2 ang gitas-on, nagsuot lang og short pants ug nagpangidaron og 30 anyos.

Matud pa sa kapuyo sa biktima nga si Janet Serevilla ngadto nila ni SPO1 Jay Yballe nga nananghid ang biktima kaniya nga dunay adtuon sa sudlunong bahin sa Villagonzalo.

Dangtan og pila ka gutlo gipahibalo na lang siyang napusilan ang biktima diha sa nahisgutang dapit.

Sa imbestigasyon sa Homicide Section, natino nga gibabagan ang biktima sa maong suspek ug walay daghang pangutana kalit kining gipusil makadaghang higayon.

Patay kini diha-diha samtang daling miikyas ang suspek sa dapit. Walay nakuhang basiyo ang kapolisan diha sa crime scene gawas lang sa usa ka gamay'ng pakete sa shabu nga gidudahang iya sa biktima.