Polis mipalupad sa motor naangol

Polis nga gipili nga usa sa mga convoy sa mga pamuno nasud nga motambong sa 12th Association of Southeast Asian Nations (Asean) summit karong Disyembre 11 ngadto sa 14 naaksidente dihang nagpraktis sa pagpalupad sa iyang motorsiklo.

Ang biktima mao si SPO1 Joel Catabas, hingkod ang panuigon ug usa sa lima ka mga sakop sa traffic force sa Mandaue City Police Office (MCPO) nga misalmot sa motor riding course nga milungtad og usa ka bulan.

Si SPO1 Eleazar Saromines, imbestigador sa traffic division sa kapolisan sa maong dakbayan nga gikahinabi sa Banat News miingon nga na-out balance si SPO1 Catabas dihang gipalupad ang giluwanan niining motorsiklo.

Matud pa ni Saromines nga ang pagpalupad sa motorsiklo maoy kabahin sa mga pagbansay-bansay sa kapin sa 200 ka mga polis nga convoy sa mga pamuno nasud atol sa Asean summit.

Dugang pa ni Saromines nga dali nga gidala si SPO1 Catabas sa Mandaue City Hospital ug gikatakda usab nga operahan ang nabali niining tiil.

Uban ni SPO1 Catabas maoy usa sa unom ka mga polis sa MCPO nga miapil sa motor riding training course nga naglakip kanila ni PO3 Proilan Gomez, SPO1 Dante Flores, PO3 Ramil Mendoza ug PO3 Joel Bintad.

Ang training nga gidumala sa Traffic Management Group (TMG) sa kapolisan sa Manila gipahigayon sa dakong hawan sa Uniwide building atbang sa Cebu International Convention Center (CICC) sa Reclamation Area sa Mandaue.