Kanhi konsehal mikiha ni Loot sa Ombudsman

Usa ka kanhi konsehal sa lungsod sa Daanbantayan ang misang-at og kaso batok kang Mayor Maria Luisa Loot sa buhatan sa Ombudsman-Visayas.

Ang mipasaka sa kaso kagahapon mao si Rosanni Luche batok kang Loot sa kasong kalapasan sa Anti-Graft and Corrupt Practices Act.

Si Luche nipasangil kang Loot nga nipapuyo sa iyang mga paryente nga sila si Helito Cañete, Isagani Judal ug uban pa sukad niadtong tuig 2002 sa luna nga gipanag-iya sa kagamhanan sa lungsod.

Matud pa ni Luche nga gumikan sa pagpasagad ni Loot sa butang sa gobyerno, naalkansi ang panudlanan og kapin sa P18-milyones nga maoy gibana-banang balor sa yuta.

Gitumbok ni Luche ang 9,247.62 metro kwadrado nga luna nga nahimutang sa barangay Poblacion nga kabahin sa gitukuran sa merkado publiko ug ihawan niadtong tuig 1939.

Sumala pa ni Luche nga dunay igong kasayuran si Loot sa maong luna sanglit iyang apohan, anhing Isaac Cañete, ang sekretaryo sa konseho sa lungsod sa dihang gipasar ang resolusyon may kalabutan sa katukuran sa merkado publiko ug ihawan.

Si Loot nga nahinabi sa Banat News nagdumili pa sa pagtubag sa maong mga pamasangil sanglit wala pa siya nakadawat sa kopya sa kaso ug wala siya nasayud sa mga pamasangil ni Luche batok kaniya.