Tanod gitulis, laing tulisan nadakpan sa TRS ug Carbon

Usa ka batan-on nga gipasanginlang tulisan ang gidemalas dihang ang iyang gitulis usa ka barangay tanod nga nagpakaaron ingnong biktima diha sa dalan Pelaez sa barangay San Antonio ning dakbayan kagahapon sa kaadlawon.

Ang suspek kinsa gidakop dayon giilang si Jason Camoo, 20, lumad nga taga Carcar ug kasamtangang caretaker og usa ka bilyaran diha sa South Bus Terminal sa barangay Pahina Central ning dakbayan.

Ang tanod nga midakop kaniya giilang si January Gia, hingkod ang panuigon, barangay tanod sa San Antonio kinsa nagpakaaron ingnong decoy aron biktimahon sa mga tulisan.

Matud pa nga ang maong dapit sagad dunay mga insidente sa mga pagpanulis maong milusad og susamang operasyon ang mga tanod nga miresulta sa pagkasikop sa suspek.

Si Gia wala magsuot sa iyang uniporme dihang gikasugat ang suspek ug kalit nga mibunot og kutsilyo dayong tion ngadto sa tanod ug mideklarar og holdap.

Si Gia mitunol sa iyang pitakang may sulod nga P10 apan pagkadawat niini kalit nga mihamag ang mga kaubang tanod ni Gia hinungdan sa pagkadakop sa suspek.

Ang suspek nga gidala sa Parian police station sa pakighinabi sa mga tigbalita mihimakak sa pasangil ug mitug-an nga igo lang siyang gisitar sa tanod nga misangpot sa mainitong siningkahay ug kalit siyang gidakop. Gihimakak pa niyang iya ang kutsilyo.

Samtang laing notadong tulisan ang nasikop sa kapolisan pinasikad sa warrant of arrest nga giluwatan ni RTC branch 6 Judge Sylva Paderanga sa kasong robbery nga may piyansang P100,000.

Ang sakop sa Theft and Robbery Section pinanguluhan ni Sr. Inspector Michael Antonio Bastes ug mga sakop sa Carbon police station misulod sa panimalay ni Edgar Cañete alyas Gady,18, diha sa Bato Ermita ning dakbayan kagahapon sa kaadlawon.

Si Cañete miangkong usa ka tulisan atol sa pakighinabi sa Banat News apan sukad nga nakagawas sa Operation Second Chance sa Kalunasan nag-usab na kini.

Napriso si Cañete niadtong Nobiyembre 1, 2004 tungod sa kasong pagpanglabni diha sa Carbon market ug nakagawas niadtong bulan sa Marso sa milabay'ng tuig.

Matud pang Bastes sa Banat News nga si Cañete duna pay laing mga kauban sa grupo nga hangtud karon gipangita sanglit sila maoy responsable sa mga pagpanglabni ug pagpanulis diha sa maong merkado.

Laing kauban ni Cañete sa maong warrant of arrest mao si Arcelino Mainit kinsa nadakpan na sa Carbon Police dili pa lang dugay.