Oliva ipalabay ni Tomas

Morekomendar si Mayor Tomas Osmeña ngadto sa Department of Education alang sa pagpabalhin gawas sa dakbayan kang Cebu City School Division Superintendent Leonilo Oliva.

Atol sa press conference ni Osmeña kagahapon sa udto giklaro niini nga wala na kinahanglana dinhi sa dakbayan ang serbisyo ni Oliva tungod kay dili kini makamao nga mosunod ug morespeto sa mga ipatuman nga kamanduan.

Gitumbok sa mayor ang kapakyas ni Oliva sa kamanduan ni Osmeña nga nagdili sa tanang mga publikong tunghaan sa elementarya ug sekondarya dinhi sa dakbayan pagkanselar sa ilang klase aron lang mosalmot og bisan unsang mga kalihukan.

Partikular nga gitumbok sa mayor ang pagkanselar sa klase sa mga tinun-an sa Abellana National School niadtong milabay'ng semana tungod sa usa ka relihiyosong seminar.

Nakontrobersyal ang maong relihiyosong kalihukan human mireklamo ang pipila ka mga tinun-ang babaye og sexual harassment batok sa usa ka pari nga mipahigayon og pagpakumpisal nga gipahigayon sa maong tunghaan.

Matud ni Osmeña panahon na nga iyang aksyonan ang pagpahulip kang Oliva sa katungdanan gumikan kay daghan nang mga higayon nga nakanselar ang klase sa mga tinun-an tungod sa mga seminar ug uban pang kalihukan nga salmotan sa mga tinun-an sama sa milabay'ng Sinulog mardigras.

Kini bisan pa man og gimando na sa mayor nga ipakanselar ang mga extra curricular activities sa mga tinun-an aron dili mabalda ang ilang klase.

Wala malipay ang mayor dihang nahibaw-an ang resulta sa National Achievement Test (NAT) sa mga tinun-an dinhi sa dakbayan sa milabay'ng tuig diin daghan ang wala makapasar ug gilupigan pa ang mga tinun-an dinhi sa dakbayan sa tinun-an sa ubang mga lugar.