Pabuto gitanom ilawom sa balay; 4-anyos angol

Usa ka 4-anyos nga batang babaye grabeng naangol sa dihang usa ka pabuto nga gituyo og butang ilawom sa ilang panimalay sa Purok Manga, Gun-ob Kalawisan, Lapulapu kagahapon sa kadlawon mibuto ug mibungkag sa salog sa iyang gihigdaan.

Ang biktima naila nga si Maria Theresa Casas, anak ni Lorito Casas Jr. nga nagpuyo sa maong dapit.

Base sa imbestigasyon ni PO3 Manolito Abellanosa sa Homicide Section sa Lapulapu Police Office, nga natulog ang bata samtang mibuto ang pabuto.

Si Lorito miasoy ngadto sa kapolisan nga samtang nahinanok og katulog silang pamilya kagahapon sa kaadlawon kalit lang nga milanog ang sipa kaayong buto ilawom sa ilang salog nga ilang gihigdaan uban sa iyang anak.

Gumikan niini, naguba ang ilang salog diin usa sa tipaka niini didto miigo sa lawas 4-anyos nga bata.

Gidali pagdala sa tambalanan si Maria Theresa apan gihulagway nga luwas na sa makuyaw nga kahimtang.

Atol sa pagresponde sa mga sakop sa SWAT team sa Lapulapu pinangulohan ni PO3 Rolan Melior, ilang nakita ang ubay-ubay pang panit sa gituhoang ginama nga pabuto ug gituyo sa paglabay ilawom sa panimalay sa mga Casas.

Matud pa ni PO3 Abellanosa posibleng adunay pagdumot sa pamilyang Casas ang nagbutang sa pabuto ilawom sa balay niini.

Apan si Lorito mihimakak nga may nagdumot kanila nga maoy hinungdan nga gitamnan og pabuto ang ilawom sa ilang balay sa kaadlawong dako.