P2.2M gihatag ni gob sa 22 ka barangay

Mokabat sa P2.2 milyones ang gihatag ni Gobernador Gwendolyn Garcia ngadto kang Mandaue City Mayor Thadeo Ouano alang sa mga proyekto sa 22 ka barangay sa maong dakbayan.

Ang paghatag sa maong kantidad giatol sa gipahigayong tapok-tapok sa mga residente sa Mandaue inubanan sa mga working committee sa Asean summit kagahapon sa buntag didto sa Mandaue Cultural and Sports Complex.

Matud pa ni Garcia nga ang maong kantidad tubag sa mga gipangayong gahin sa 22 ka barangay sa Mandaue ngadto sa iyang buhatan human kini mihatag sa ilang program of works ug ang aprobadong resolusyon sa barangay alang sa ilang mga proyekto.

Sa 27 ka barangay sa Mandaue, 22 lamang ang nahatagan sa maong gahin nga tag P100 mil matag usa gumikan kay ang lima ka barangay napakyas kini sa pagsumiter sa mga rekisitos.

Ang lima ka barangay nga wala maapil sa maong gahin naglangkob sa Jagobiao, Pagsabungan, Opao, Umapad ug Casuntingan.