9 ka sitio sa Suba naigo sa demolisyon

Siyam ka sitio sa barangay Suba gi-demolish sa miaging adlaw sa buntag nga naresulta sa gamay'ng panaglalis tali sa usa ka residente ug si Kapitan Joel Sable nga maoy miuban sa mga sakop sa Squatters Prevention and Encroachment Elimination Division.

Si Sable nga gikahinabi sa Banat News miingon nga ang demolisyon sa Suba gitumong sa paglimpyo sa dalan diin ang ubang balay niini milapas na sa kanal nga ilang gitukoran ug maoy hinungdan nga gamay tan-awon ang dalan sa maong lugar ug lisod usab limpyohan ang mga kanal.

Dugang pa ni Sable nga gipadalhan na usab nila kini og notisya 10 na ka adlaw sa wala pa mahitabo ang demolisyon.

"Ok ra man ang demolisyon nga gihimo sa among barangay, naay usa nga akong nakalalis kay nagtuo man siya wala siya molapas sa kanal pero pagtan-aw namo sa kilid milapas man kini pero, hapsay naman karon ang maong demolisyun," matud pa ni Sable

Midugang usab kini nga ang ilang barangay maoy magmonitor kada-adlaw kun ugaling mobalik man sa pagtukod ang mga residente. Matud pa ni Sable nga niadtong Oktubre 12 ning tuiga lang gipirmahan ni Mayor Tomas Osmeña ang demolition order sa maong barangay ug sa miaging adlaw lang kini nila gihimo.