Navy gikulata sa duha sa BIN

Duha ka mga sakop sa Barangay Intelligence Network sa Criminal Investigation ang Intelligence Branch sa Cebu City Police Office ang gireklamong nangulata og sakop sa Philippine Navy kagahapon sa kaadlawon.

Ang mga gipasanginlang nangulata giilang sila si Jose Ogsang,31, taga dalan Legaspi sa Sto.Niño ning dakbayan ug Henry Nuevo,30, taga dalan Panganiban kinsa gikonpirmar ni SPO2 Jessie Arong sa CIIB nga ilang mga sakop.

Samtang ang biktima giilang si Technical Sergeant Raul Patigayon,49, lumad nga taga Carcar ug sakop sa Naval Force Central (NAVFORCEN) nga nagbase sa Lapu-Lapu.

Sumala pa sa report nga hubog ang biktima ug milingkod diha sa usa ka lingkoranan sa Plaza Independencia dihang dihay usa ka batan-on nga natuparan sa biktima nga mireklamong nakuotan sa iyang pitaka.

Gikatahong misumbong ang batan-on ngadto sa duha ka BIN kinsa giingong nadestino sa maong dapit isip magbalantay ug maniid niadtong gabhiona ang batan-on.

Apan dihang ilang gikomprontase si TSgt. Patigayon mihimakak kini sa pasangil nga nanguha siya'g pitaka ug mipailang sakop sa Philippine Navy hinungdan sa mainitong panaglalis ug diha na mahitabo ang giingong pagpangulata.

Sumala pa, ang biktima gikulata ni Ogsang samtang ang usa nakit-ang dunay gihuptang armas ug gidala siya ngadto sa police station diin sila gihusay.

Si SPO1 Ernesto Caballero, desk officer sa maong buhatan nga gikahinabi sa Banat News mitug-an nga base sa ilang rekord, 'trouble alarm' ray natala nga gikalambigitan sa tulo.

Matud niini nga usa lang ka gamay'ng wala pagsinabtanay ang nahitabo nga misangpot nga nagkasakitay sa duha ka habig apan kagahapon nagkauliay ra sila sa ilang buot.

Si Arong kinsa maoy giadtoan ni TSgt Patigayon kagahapon aron mangutana kun sakop ba nila ang duha mitug-an nga ilang ipatawag ang duha aron matino ang hinungdan sa kagubot.

Matud pa niini nga ipasusi usab nila kun tinuoray ba nga nagdala ang usa kanila og armas sanglit gidili ni Supt. Pablo Labra ang pagdaladala og armas sa mga BIN